എൻ ഡി എ യുടെ ഉപരാഷ്ട്രപതി സ്ഥാനാർത്ഥിയായി ബംഗാൾ ഗവർണർ ജഗ്ദീപ് ധൻഖറിനെ തീരുമാനിച്ചു. രാജസ്ഥാനിലെ കിത്താനാ സ്വദേശിയായ ധൻഖര്‍ 2019 ലാണ് ഗവർണറാകുന്നത് . പ്രതിപക്ഷത്തിൻറെ ഉപരാഷ്ട്രപതി സ്ഥാനാർത്ഥിയെ നാളെ പ്രഖ്യാപിച്ചേക്കും. ഓഗസ്റ്റ് ആറിനാണ് ഉപരാഷ്ട്രപതി തെരഞ്ഞെടുപ്പ്.
കേരള ഗവർണർ ആരിഫ് മുഹമ്മദ് ഖാൻ, മുൻ കേന്ദ്ര ന്യൂനപക്ഷ കാര്യമന്ത്രി മുഖ്‌താർ അബ്ബാസ് നഖ്‌വി എന്നിവരുടെ പേരുകള്‍ സജീവമായി ചർച്ചയായിരുന്നെങ്കിലും ഒടുവിൽ ധൻഖർക്ക് നറുക്ക് വീഴുകയായിരുന്നു. ബിജെപി പാർലമെൻററി പാർട്ടി യോഗത്തിൻറെതാണ് തീരുമാനം. അഭിഭാഷകനായിരുന്ന ധൻഖർ സുപ്രിം കോടതി അഭിഭാഷകനായും രാജസ്ഥാൻ ഹൈക്കോടതി ബാർ അസോസിയേഷൻ പ്രസിഡൻറായും പ്രവർത്തിച്ചിട്ടുണ്ട്. കർഷകൻറെ മകനാണ് ധൻഖറെന്ന് ബിജെപി ദേശീയ അധ്യക്ഷൻ ജെ.പി. നദ്ദ പറഞ്ഞു. നിലവിലെ ഉപരാഷ്ട്രപതി വെങ്കയ്യ നായിഡുവിന്റെ കാലാവധി ഓഗസ്റ്റ് 10 ന്‌ അവസാനിക്കും.
പ്രതിപക്ഷ പാർട്ടികളുടെ ഉപരാഷ്ട്രപതി സ്ഥാനാർത്ഥിയെ തെരഞ്ഞെടുക്കാൻ നാളെ യോഗം ചേരും. പ്രതിപക്ഷ പാർട്ടികളുടെ യോഗത്തിൽ എല്ലാ പാർട്ടികളും പങ്കെടുക്കുമെന്ന് രാജ്യസഭയിലെ പ്രതിപക്ഷ നേതാവ് മല്ലികാർജുൻ ഖാർഗെ പറഞ്ഞു. ജൂലൈ 19 നാണ് സ്ഥാനാർത്ഥി നാമനിർദ്ദേശം നടത്താനുള്ള അവസാന ദിവസം.
ആം ആദ്മി പാർട്ടിയുടെ പിന്തുണ യശ്വന്ത്‌ സിൻഹയ്ക്ക്
ഇന്ന് ചേർന്ന രാഷ്ട്രീയ നിർദേശക കമ്മിറ്റി യോഗത്തിൽ രാഷ്‌ട്രപതി തെരഞ്ഞെടുപ്പിൽ പ്രതിപക്ഷ പാർട്ടി സ്ഥാനാർഥിയായ യശ്വന്ത്‌ സിൻഹയെ പിന്തുണയ്ക്കാൻ തീരുമാനമായി. യോഗത്തിൽ അരവിന്ദ് കെജ്‌രിവാൾ, ഡൽഹി ഉപമുഖ്യമന്ത്രി മനീഷ് സിസോഡിയ, സഞ്ജയ് സിങ്, പഞ്ചാബ് എംപി രാഘവ് ഛദ്ദ, എംഎൽഎ അടിഷി, എന്നിവർ പങ്കെടുത്തു. ജൂൺ 18 നാണ് രാഷ്‌ട്രപതി തെരഞ്ഞെടുപ്പ്.
