മഹാരാഷ്ട്ര തിരഞ്ഞെടുപ്പ്: 99 സ്ഥാനാര്‍ഥികളുടെ ആദ്യഘട്ട പട്ടിക പുറത്തിറക്കി ബിജെപി
മഹാരാഷ്ട്ര നിയമസഭ തിരഞ്ഞെടുപ്പിനുള്ള 99 സ്ഥാനാര്‍ഥികളുടെ ആദ്യഘട്ട പട്ടിക പുറത്തിറക്കി ബിജെപി. ഉപമുഖ്യമന്ത്രി ദേവേന്ദ്ര ഫഡ്‌നാവിസ് തന്‌റെ ശക്തികേന്ദ്രമായ നാഗ്പൂര്‍ സൗത്ത് വെസ്റ്റില്‍നിന്ന് ജനവിധി തേടും.
ബിജെപി നേതാവും രാജ്യസഭാ എംപിയുമായ അശോക് ചവാന്‌റെ മകള്‍ ശ്രിജയ ചവാന്‍ ഭോക്കറിലും മഹാരാഷ്ട്ര ബിജെപി പ്രസിഡന്‌റ് ചന്ദ്രശേഖര്‍ ബവാന്‍കുലെ കാംതിയിലും മത്സരിക്കും.
സംസ്ഥാന മന്ത്രിമാരായ ജംനെറില്‍നിന്നുള്ള ഗിരിഷ് മഹാരാജന്‍, ബല്ലാര്‍പൂരില്‍നിന്നുള്ള സുധിര്‍ മുന്‍ഗന്തിവാര്‍, വാന്ദ്രെ വെസ്റ്റില്‍ നിന്നുള്ള ആശിഷ് ഷെലാര്‍, മലബാര്‍ ഹില്ലില്‍ നിന്നുള്ള പ്രഭാത് ലോധ, കൊളബയില്‍ നിന്നുള്ള രാഹുല്‍ നര്‍വേക്കര്‍, സതാരയില്‍ നിന്നുള്ള ഛത്രപതി ശിവേന്ദ്ര രാജെ ഭോസ്ലെ എന്നിവരും പട്ടികയിലിടം പിടിച്ചിട്ടുണ്ട്.
നവംബര്‍ 20നാണ് മഹാരാഷ്ട്രയില്‍ തിരഞ്ഞെടുപ്പ് നടക്കുക. 23നാണ് ഫലപ്രഖ്യാപനം.
2019-ലെ തിരഞ്ഞെടുപ്പില്‍ 105 സീറ്റാണ് ബിജെപി നേടിയത്. ശിവസേന ( ഉദ്ധവ് താക്കറെ- ഏക്നാഥ് ഷിന്‍ഡെ വിഭാഗം ഒന്നിച്ച്) 56 സീറ്റും കോണ്‍ഗ്രസ് 44 സീറ്റും നേടിയിരുന്നു.
2014-ലെ തിരഞ്ഞെടുപ്പില്‍ 122 സീറ്റ് നേടി ബിജെപി മികച്ച പ്രകടനം കാഴ്ചവെച്ചു. ശിവസേന 63ഉം കോണ്‍ഗ്രസ് 42 സീറ്റുമാണ് നേടിയത്.
