കോൺഗ്രസ് അധികാരത്തിലെത്തിയാൽ ആദ്യം നടത്തുക ജാതി സെന്‍സസ്‌: രാഹുൽ ഗാന്ധി
രാജ്യത്ത് കോൺഗ്രസ് ഭരണത്തിലെത്തിയാൽ ആദ്യം ചെയ്യുന്നത് രാജ്യത്ത് ഒബിസിക്കാരുടെ കണക്ക് കൃത്യമായി അറിയാന്‍ ജാതി സെൻസസ് നടത്തുകയായിരിക്കുമെന്ന് കോൺഗ്രസ് എം പി രാഹുൽ ഗാന്ധി. മധ്യപ്രദേശിൽ ഷാജാപൂർ ജില്ലയിലെ കലപിപാൽ നിയമസഭാ മണ്ഡലത്തിലെ പൊതുയോഗത്തെ അഭിസംബോധന ചെയ്ത് സംസാരിക്കുകയായിരുന്നു രാഹുൽ.
രാജ്യത്ത് നയങ്ങളും നിയമങ്ങളും രൂപീകരിക്കുന്നതിൽ ബിജെപി എം പിമാർക്കും എം എൽ എമാർക്കും യാതൊരു പങ്കുമില്ലെന്ന് പറഞ്ഞ രാഹുൽ കാബിനറ്റ് സെക്രട്ടറിയും സെക്രട്ടറിമാരും ഉൾപ്പെടുന്ന 90 ഉദ്യോഗസ്ഥരാണ് രാജ്യം ഭരിക്കുന്നതെന്നും കൂട്ടിച്ചേർത്തു. തിരഞ്ഞെടുത്ത ബിജെപി അംഗങ്ങൾക്ക് വേണ്ടി ആർഎസ്എസുകാരും ബ്യൂറോക്രാറ്റുകളും പ്രത്യേക നിയമങ്ങൾ രൂപീകരിക്കുന്ന അവസ്ഥയാണ് രാജ്യത്ത് നിലവിൽ ഉള്ളതെന്നും കോൺഗ്രസ് നേതാവ് ആരോപിച്ചു.
വ്യാപം പോലുള്ള അഴിമതികൾ സംസ്ഥാനത്തെ പിടിച്ചു കുലുക്കിയെന്ന് പറഞ്ഞ രാഹുൽ രാജ്യത്തെ അഴിമതിയുടെ പ്രഭവകേന്ദ്രമാണ് മധ്യപ്രദേശെന്നും കൂട്ടിച്ചർത്തു. 'തോന്നിയത് പോലെ എംബിബിഎസ് ബിരുദങ്ങൾ വിൽക്കുന്നു, പരീക്ഷാ ചോദ്യപേപ്പറുകൾ ചോർത്തി കൊടുക്കുകയും വിൽക്കുകയും ചെയ്യുന്നു' രാഹുൽ വ്യക്തമാക്കി.
