ഡല്‍ഹിയില്‍ ധാബയിലെ ഫ്രീസറില്‍ ഇരുപത്തിയഞ്ചുകാരിയുടെ മൃതദേഹം; ഉടമ അറസ്റ്റില്‍
തെക്കുപടിഞ്ഞാറൻ ഡൽഹിയിലെ നജഫ്ഗഡിലെ ധാബയിൽ ഫ്രീസറിനുള്ളിൽ 25 കാരിയായ യുവതിയുടെ മൃതദേഹം കണ്ടെത്തി. ഡല്‍ഹി ഉത്തംനഗർ സ്വദേശിയായ യുവതി മൂന്ന് ദിവസം മുന്‍പാണ് കൊല്ലപ്പെട്ടതെന്നാണ് പോലീസിന്റെ നിഗമനം. സംഭവത്തില്‍ ധാബ ഉടമ സഹീല്‍ ഗഹ്ലോട്ടിനെ പോലീസ് അറസ്റ്റ് ചെയ്തു. മൃതദേഹം പോസ്റ്റ്മോർട്ടത്തിന് അയച്ചു.
സഹീല്‍ ഗഹ്‌ലോട്ടും യുവതിയും തമ്മിൽ പ്രണയത്തിലായിരുന്നുവെന്ന് പോലീസ് ഓഫീസർ വിക്രം സിങ് പറഞ്ഞു. ഇതിനിടെ ഇയാള്‍ മറ്റൊരു സ്ത്രീയെ വിവാഹം കഴിക്കാന്‍ തീരുമാനിച്ചു. ഇതറിഞ്ഞ യുവതി ഗഹ്‌ലോട്ടുമായി വഴക്കുണ്ടാക്കുകയും തന്നെ വിവാഹം കഴിക്കണമെന്ന് ആവശ്യപ്പെടുകയും ചെയ്തു. തുട‍ർന്ന് ഇയാള്‍ യുവതിയെ ആക്രമിക്കും കൊലപ്പെടുത്തുകയും ചെയ്യുകയായിരുന്നു. പിന്നീട് ഇയാൾ മൃതദേഹം ധാബയിലെ ഫ്രീസറിൽ സൂക്ഷിക്കുകയായിരുന്നു.
നാല് മാസം മുന്‍പാണ് ശ്രദ്ധ വാല്‍ക്കർ എന്ന യുവതിയെ കൊന്ന് മൃതദേഹം ഫ്രിഡ്ജില്‍ സൂക്ഷിച്ചതിന് കാമുകനായ അഫ്താബ് പൂനാവാലയെ പോലീസ് അറസ്റ്റ് ചെയ്തത്. രാജ്യത്തെ നടുക്കിയ കേസില്‍ അന്വേഷണം പുരോഗമിക്കവെയാണ് വീണ്ടും സമാനമായ കൊലപാതകം.
