കൊളീജിയം ശുപാർശ അംഗീകരിച്ചു; മൂന്ന് ഹൈക്കോടതികളില്‍ പുതിയ ചീഫ് ജസ്റ്റിസുമാരെ നിയമിച്ച് കേന്ദ്രം
രാജ്യത്തെ മൂന്ന് ഹൈക്കോടതികളിലേക്ക് പുതിയ ചീഫ് ജസ്റ്റിസുമാരെ നിയമിച്ച് കേന്ദ്ര സർക്കാർ വിജ്ഞാപനം പുറപ്പെടുവിച്ചു. അലഹബാദ്, ഛത്തീസ്ഗഢ്, പാറ്റ്ന എന്നീ ഹൈക്കോടതികളിലേക്കാണ് നിയമനം. കേരള ഹൈക്കോടതി ജഡ്ജി ജസ്റ്റിസ് കെ വിനോദ് ചന്ദ്രനെ പട്ന ഹൈക്കോടതിയുടെ ചീഫ് ജസ്റ്റിസായി നിയമിച്ചു.
അലഹബാദ് ഹൈക്കോടതി ജഡ്ജിയായിരുന്ന ജസ്റ്റിസ് രമേഷ് സിൻഹയെ ഛത്തീസ്ഗഢ് ഹൈക്കോടതി ചീഫ് ജസ്റ്റിസായി നിയമിച്ചു. അലഹബാദ് ഹൈക്കോടതി ജഡ്ജിയായിരുന്ന പ്രിതിങ്കര്‍ ദിവാകറിനെയാണ് അലഹബാദ് ഹൈക്കോടതി ചീഫ് ജസ്റ്റിസായി നിയമിച്ചത്. കേന്ദ്ര നിയമ മന്ത്രി കിരൺ റിജിജു ട്വിറ്ററിലൂടെ നിയമനവിവരം അറിയിച്ചു.
ഫെബ്രുവരി 9നാണ് ജസ്റ്റിസ് ദിവാകറിനെയും ജസ്റ്റിസ് രമേഷ് സിൻഹയേയും അലഹബാദ് ഹൈക്കോടതി ചീഫ് ജസ്റ്റിസായി നിയമിക്കാൻ സുപ്രീം കോടതി കൊളീജിയം ശുപാർശ ചെയ്തത്. ജസ്റ്റിസ് വിനോദ് ചന്ദ്രനെ ഗുവാഹത്തി ഹൈക്കോടതി ചീഫ് ജസ്റ്റിസായി നിയമിക്കാൻ കൊളീജിയം ആദ്യം ശുപാർശ ചെയ്തിരുന്നുവെങ്കിലും പിന്നീട് അത് പിൻവലിച്ചിരുന്നു. പട്ന ഹൈക്കോടതിയിലെ മുൻ ചീഫ് ജസ്റ്റിസ് സഞ്ജയ് കരോളിനെ ഫെബ്രുവരിയിൽ സുപ്രീം കോടതിയിലേക്ക് ഉയർത്തിയിരുന്നു.
സുപ്രീംകോടതി കൊളീജിയം നിർദേശിച്ച അഞ്ച് പുതിയ ജഡ്ജിമാരുടെ നിയമനവും ഫെബ്രുവരി മാസമാദ്യം കേന്ദ്ര സർക്കാർ അംഗീകരിച്ചിരുന്നു. പങ്കജ് മിത്തൽ (രാജസ്ഥാൻ ഹൈക്കോടതി ചീഫ് ജസ്റ്റിസ്), സഞ്ജയ് കരോൾ (പട്ന ഹൈക്കോടതി ചീഫ് ജസ്റ്റിസ്), പി വി സഞ്ജയ് കുമാർ (മണിപ്പൂർ ഹൈക്കോടതി ചീഫ് ജസ്റ്റിസ്) അഹ്സാനുദ്ദിൻ അമാനുല്ലഹ് (പട്ന ഹൈക്കോടതി ജഡ്ജ്), മനോജ് മിശ്ര (അലഹബാദ് ഹൈക്കോടതി ജഡ്ജ്) എന്നിവരുടെ നിയമനമായിരുന്നു കേന്ദ്രം അംഗീകരിച്ചത്. നിയമനത്തില്‍ ദീർഘകാലത്തെ കൊളീജിയം -കേന്ദ്രസർക്കാർ തർക്കത്തിനൊടുവിലായിരുന്നു നിയമനം.
