ഓടിക്കൊണ്ടിരുന്ന കാറിൽ കൂട്ടബലാത്സംഗം: ബെംഗളൂരുവിൽ നാലുപേർ അറസ്റ്റിൽ

ബെംഗളൂരുവില്‍ പെണ്‍കുട്ടിയെ പാർക്കിൽ നിന്ന് വലിച്ചിഴച്ച് കൊണ്ടുപോയി ഓടുന്ന കാറിൽ കൂട്ടബലാത്സംഗം ചെയ്തു. ബെംഗളൂരു കോറമംഗലയിൽ നാഷ്ണൽ ഗെയിംസ് വില്ലേജിന് സമീപത്തെ പാർക്കിൽ നിന്നാണ് പത്തൊൻപതുകാരിയെ കടത്തി കൊണ്ടുപോയി ക്രൂരമായ ലൈംഗികാതിക്രമത്തിന് ഇരയാക്കിയത്. സംഭവവുമായി ബന്ധപ്പെട്ട് നാല് യുവാക്കളെ ബെംഗളൂരു പോലീസ് അറസ്റ്റ് ചെയ്തു. മാർച്ച് 25 ന് നടന്ന സംഭവമാണ് ഇപ്പോൾ പുറത്തുവന്നത്.

സംഭവത്തെ കുറിച്ച് പോലീസ് പറയുന്നതിങ്ങനെ:

സംഭവം നടന്ന രാത്രി പെൺകുട്ടി സുഹൃത്തിനൊപ്പം ഗെയിംസ് വില്ലേജിന് സമീപത്തെ പാർക്കിൽ വിശ്രമിക്കുകയായിരുന്നു. പ്രതികളിൽ ഒരാൾ ഇവർ പുക വലിച്ചതിനെ ചോദ്യം ചെയ്തെത്തിയതോടെ തർക്കമുണ്ടായി. പാര്‍ക്കില്‍ നിന്ന് പോയ പ്രതി മറ്റ് മൂന്നുപേര്‍ക്കൊപ്പം 11 മണിയോടെ  മടങ്ങിയെത്തി. ഈ സമയം പെൺകുട്ടി പാർക്കിൽ തനിച്ചായിരുന്നു. നാലുപേരും ചേർന്ന് പെൺകുട്ടിയെ വലിച്ചിഴച്ച് കാറിൽ കയറ്റി. ഹൊസൂർ റോഡ്, നൈസ് റോഡ് തുടങ്ങിയ ആളൊഴിഞ്ഞ നിരത്തുകളിലൂടെ വാഹനം ഓടിച്ച്  പെൺകുട്ടിയെ സംഘം ലൈംഗിക അതിക്രമത്തിനിരയാക്കി.

പുലർച്ചെ മൂന്നരയോടെ കോറമംഗലയ്ക്കടുത്തുള്ള ഈജിപ്പുരയിൽ നിരത്തു വക്കിൽ പെൺകുട്ടിയെ തള്ളിയെ ശേഷം സംഘം സ്ഥലം വിടുകയായിരുന്നു. വീട്ടുകാരുടെയും സുഹൃത്തുക്കളുടെയും സഹായത്തോടെ ചികിത്സ തേടിയ ശേഷമാണ് പെൺകുട്ടി പരാതിയുമായി പോലീസിനെ സമീപിച്ചത്. പെൺകുട്ടി നൽകിയ വിവരത്തിന്റെ അടിസ്ഥാനത്തിൽ സിസിടിവി ദൃശ്യങ്ങളുടെ സഹായത്തോടെയാണ് പോലീസ് പ്രതികളെ കുടുക്കിയത് . പ്രതികളെ കണ്ടെത്തുന്നതിനായി രണ്ട് പ്രത്യേക സംഘത്തെ നിയോഗിച്ചിരുന്നതായി പോലീസ് കമ്മീഷണർ സി കെ ബാബ പറഞ്ഞു. അന്വേഷണം പുരോഗമിക്കുന്നതിനാൽ പ്രതികളുടെ പേര് വിവരങ്ങൾ പോലീസ് പുറത്തു വിട്ടിട്ടില്ല.