ബിനീഷ് കോടിയേരിക്ക് താത്കാലിക ആശ്വാസം; ലഹരിക്കടത്തിനായി കള്ളപ്പണം വെളുപ്പിച്ചെന്ന ഇ ഡി കേസ് വിചാരണയ്ക്ക് സ്റ്റേ

കള്ളപ്പണം വെളുപ്പിക്കൽ കേസിൽ ബിനീഷ് കോടിയേരിയെ പ്രതി ചേർത്ത്  എൻഫോഴ്‌സ്‌മെന്റ്  ഡയറക്ട്രേറ്റ്  രെജിസ്റ്റർ ചെയ്ത കേസിന്റെ വിചാരണക്ക് കർണാടക ഹൈക്കോടതിയുടെ താത്കാലിക  സ്റ്റേ . 2021 ൽ ബെംഗളൂരുവിൽ രെജിസ്റ്റർ ചെയ്ത കേസിന്റെ വിചാരണയാണ്  കോടതി തൽക്കാലത്തേക്ക്  നിർത്തിവെപ്പിച്ചത്  . കേസിൽ നാലാം പ്രതിയായ ബിനീഷ് കോടിയേരി സമർപ്പിച്ച വിടുതൽ  ഹർജി തീർപ്പാകും വരെയാണ്  വിചാരണ നടപടികൾക്ക് കോടതി സ്റ്റേ കല്പിച്ചിരിക്കുന്നത്  , ഇക്കാലമത്രയും ബിനീഷ് കോടതിയിൽ ഹാജരാകേണ്ടതില്ലെന്നും കർണാടക ഹൈക്കോടതി സിംഗിൾ ബെഞ്ച് ഇടക്കാല സ്റ്റേ അനുവദിച്ചു കൊണ്ട് വ്യക്തമാക്കി . ലഹരിക്കടത്ത് കേസിൽ പ്രതിയല്ലാത്ത ഒരാളെ അതിന്റെ മറവിൽ കള്ളപ്പണം വെളുപ്പിച്ച കേസിൽ പ്രതിയാക്കുന്നതെങ്ങനെയെന്നു കേസിന്റെ വാദത്തിനിടെ കോടതി വാക്കാൽ ആരാഞ്ഞു .  ബിനീഷിന്റെ ഹർജിയിൽ കോടതിയിൽ വാദം തുടരും .

ബെംഗളൂരു  സെൻട്രൽ ക്രൈം  ബ്രാഞ്ച് രജിസ്റ്റർ ചെയ്ത ലഹരികടത്തു കേസിന്റെ ചുവടുപിടിച്ചായിരുന്നു  പ്രതികളിൽ ഒരാളായ അനൂപ് മുഹമ്മദിന്റെയും സാക്ഷി   മൊഴികളുടെയും   അടിസ്ഥാനത്തിൽ  എൻഫോഴ്‌സ്‌മെന്റ് ഡയറക്ട്രേറ്റ് ബിനീഷ് കൊടിയേരിക്കെതിരെ കേസെടുത്തത് . ലഹരികടത്തു കേസിലെ പ്രതികൾക്ക്  ബിനീഷ് സാമ്പത്തിക സഹായം നൽകുകയും  അത് വഴി  കള്ളപ്പണം വെളുപ്പിച്ചെന്നുമായിരുന്നു ഇ ഡി യുടെ കുറ്റപത്രം . കേസിൽ അറസ്റ്റിലായ  ഒരു വർഷക്കാലം പരപ്പന അഗ്രഹാര ജയിലിൽ കഴിഞ്ഞ ബിനീഷിനു കോടതി പിന്നീട് ഉപാധികളോടെ ജാമ്യം അനുവദിക്കുകയായിരുന്നു .

പ്രതി പട്ടികയിൽ നിന്ന് തന്നെ ഒഴിവാക്കണമെന്നാവശ്യപ്പെട്ട്   വിചാരണ കോടതി മുൻപാകെ  ബിനീഷ് സമർപ്പിച്ച ഹർജി നേരത്തെ  ബംഗളുരുവിലെ  34  ആം അഡീഷണൽ  സിറ്റി സിവിൽ ആൻഡ് സെഷൻസ്  കോടതി ജഡ്ജി തള്ളിയിരുന്നു . ലഹരിക്കടത്ത് കേസിൽ പ്രതിയല്ലാത്ത തനിക്കെതിരെ   കള്ളപ്പണം  വെളുപ്പിക്കൽ കേസ് നിലനിൽക്കില്ല എന്നതായിരുന്നു  ബിനീഷിന്റെ വാദം  .  തുടർന്നായിരുന്നു  കർണാടക ഹൈക്കോടതിയെ ബിനീഷ് സമീപിച്ചത് .

ലഹരിക്കടത്ത് കേസിലെ പ്രതികളായ  അനിഖ , അനൂപ് മുഹമ്മദ് , റിജേഷ് രവീന്ദ്രൻ എന്നിവർ തന്നെയാണ് കള്ളപ്പണം വെളുപ്പിക്കൽ കേസിലെ ബിനീഷിന്റെ കൂട്ട് പ്രതികൾ .  ഇരു കേസുകളിലും  അറസ്റ്റിലായി   പരപ്പന അഗ്രഹാര ജയിലിൽ കഴിഞ്ഞ ഇവർക്ക് കോടതി  അടുത്തിടെ  ജാമ്യം  അനുവദിച്ചിരുന്നു .