വീണ്ടും തിരിച്ചടികള്: മന്ത്രിസ്ഥാനത്ത് നിന്നും പാര്ട്ടി സെക്രട്ടറി സ്ഥാനത്ത് നിന്നും ചാറ്റര്ജിയെ പുറത്താക്കി
അധ്യാപകനിയമ കുഭകോണത്തില് ഇഡി അറസ്റ്റ് ചെയ്ത പാര്ഥ ചാറ്റര്ജിയെ മന്ത്രിസഭയില് നിന്ന് പുറത്താക്കിയതിന് പിന്നാലെ പാര്ട്ടി ജനറല് സെക്രട്ടറി സ്ഥാനത്ത് നിന്നും നീക്കി. രണ്ട് സ്ഥാനങ്ങളും നഷ്ടമായതോടെ പാര്ഥ ചാറ്റര്ജിയുടെ രാഷ്ട്രീയ ഭാവി അനിശ്ചിതത്വത്തിലായിരിക്കുകയാണ്. കുറ്റക്കാരനാണെന്ന് തെളിയിക്കപ്പെടുന്നതുവരെ പാര്ഥ ചാറ്റര്ജിയെ മന്ത്രി സ്ഥാനത്ത് നിന്ന് നീക്കില്ലെന്നായിരുന്നു പാര്ട്ടി ആദ്യം സ്വീകരിച്ച നിലപാട്. എന്നാല് അര്പ്പിതയുടെ ഫ്ളാറ്റില് കൂടുതല് തുക കണ്ടെത്തിയതോടെ തീരുമാനം മാറ്റുകയായിരുന്നു. ബിജെപി സര്ക്കാര് കേന്ദ്ര ഏജന്സികളെ ദുരുപയോഗം ചെയ്യുകയാണെന്ന വാദത്തില് ഉറച്ചു നില്ക്കാന് തൃണമൂല് കോണ്ഗ്രസിന് സാധിക്കുന്നില്ല.
ഇ ഡി നടത്തിയ പരിശോധനയില് പാര്ഥ ചാറ്റര്ജിയുടെ സുഹൃത്തായ അര്പിത മുഖര്ജിയുടെ ഫ്ളാറ്റില് നിന്ന് 50 കോടിയോളം രൂപ കണ്ടെത്തിയതോടെയാണ് മന്ത്രി സ്ഥാനത്ത് നിന്നും ജനറല് സെക്രട്ടറി സ്ഥാനത്ത് നിന്നുമുള്ള പുറത്താക്കല്. ജൂലൈ 23 ന് നടത്തിയ പരിശോധനയില് മാത്രം 21 കോടി കോടി രൂപയാണ് അര്പിതയുടെ ഫ്ളാറ്റില് നിന്ന് കണ്ടെത്തിയത്. സര്ക്കാര് സ്കൂളിലെ അധ്യാപകരുടെയും മറ്റ് ജീവനക്കാരുടെയും നിയമനത്തില് അഴിമതി ആരോപിച്ചാണ് മന്ത്രി പാര്ഥ ചാറ്റര്ജിയെ അറസ്റ്റ് ചെയ്യുന്നത്.
തൃണമൂല് കോണ്ഗ്രസ് നേതാവും ബംഗാള് മുഖ്യമന്ത്രിയുമായ മമതാ ബാനര്ജിയെ സംബന്ധിച്ചടത്തോളം വലിയ പ്രതിസന്ധിയാണ് നേരിടുന്നത്. മമത കഴിഞ്ഞാല് തൃണമൂല് കോണ്ഗ്രസില് തീരുമാനങ്ങളെടുത്തിരുന്നത് പാര്ഥ ചാറ്റര്ജിയായിരുന്നു.
പാര്ഥ ചാറ്റര്ജിയെ വ്യവസായ മന്ത്രി സ്ഥാനത്ത് നിന്ന് പുറത്താക്കണമെന്ന് സ്വന്തം പാര്ട്ടിയിലെ അംഗങ്ങള് പോലും ആവശ്യമുന്നയിച്ചിരുന്നുവെന്നാണ് റിപ്പോര്ട്ട്. മന്ത്രിയുടെ അറസ്റ്റോടെ തൃണമൂലിനെതിരെ വന് പ്രതിരോധമാണ് ബിജെപി തീര്ക്കുന്നത്. അറസ്റ്റ് വിഷയത്തില് മുഖ്യമന്ത്രി മമതാ ബാനര്ജി എന്തുകൊണ്ട് മൗനം പാലിക്കുന്നുവെന്നായിരുന്നു ബിജെപി നേതാക്കളുടെ ചോദ്യം.
