നിഖിലിനെ തുണയ്ക്കുമോ പട്ടുനൂൽ പട്ടണം? ത്രികോണ മത്സരച്ചൂടിൽ രാമനഗര

കർണാടകയുടെ പട്ടുനൂൽ പട്ടണമായ രാമനഗരയുടെ മുക്കിലും മൂലയിലും എത്തുകയാണ് ജനതാദൾ എസ് സ്ഥാനാർഥി നിഖിൽ കുമാരസ്വാമിയുടെ  തിരഞ്ഞെടുപ്പ് പ്രചാരണ വാഹനം . ‌ രാമനഗരയിലെ സ്ഥാനാർഥിത്വം ജെഡിഎസ് നേരത്തെ തന്നെ ഉറപ്പാക്കിയതിനാൽ ഇതിനോടകം  നിഖിൽ ആദ്യഘട്ട  മണ്ഡല പര്യടനം ഏറെക്കുറെ പൂർത്തിയാക്കി കഴിഞ്ഞു . 

നിഖിലിന്റെ രണ്ടാമത്തെ തിരഞ്ഞെടുപ്പ് അങ്കം   

നിയമസഭയിലേക്കിത് കന്നി അങ്കമാണെങ്കിലും 2019ൽ ലോക്സഭാ തെരഞ്ഞെടുപ്പിൽ മത്സരിച്ച അനുഭവ സമ്പത്തുമായാണ് ശക്തമായ ത്രികോണ മത്സരം പ്രതീക്ഷിക്കുന്ന രാമനഗരയിൽ നിഖിൽ പോരാട്ടത്തിന് ഇറങ്ങുന്നത് . അമ്മ അനിത കുമാരി സ്വാമിയുടെ സിറ്റിങ് സീറ്റാണ് രാമനഗര. 2018ലെ നിയമസഭാ തിരഞ്ഞെടുപ്പിൽ രാമനഗരയിൽ നിന്നും  ചന്ന പട്ടണയിൽ നിന്നും ജനവിധി തേടിയ  എച്ച് ഡി കുമാരസ്വാമി  രാജിവച്ച മണ്ഡലത്തിലായിരുന്നു ഉപതിരഞ്ഞെടുപ്പ്  ജയിച്ച്  ഭാര്യ അനിത എംഎൽഎയായത് . ഇത്തവണ അനിത കുമാരസ്വാമി മണ്ഡലം മകന് വിട്ടുനൽകി തെരഞ്ഞെടുപ്പ് അങ്കത്തിൽ നിന്ന് മാറി നിൽക്കുകയാണ് . 

സുമലതയോട് തോറ്റ് അരങ്ങേറ്റം 

2019ൽ മണ്ടിയ ലോക്സഭാ മണ്ഡലത്തിൽ മത്സരിച്ചായിരുന്നു നിഖിൽ തിരഞ്ഞെടുപ്പ് രാഷ്ട്രീയത്തിന്  തുടക്കമിട്ടത് . ജെഡിഎസിന്റെ ഉറച്ച കോട്ടയായ ഓൾഡ് മൈസൂർ മേഖലയിലെ മണ്ടിയ എളുപ്പത്തിൽ കൈപിടിയിലാക്കാം എന്ന ആത്മവിശ്വാസത്തിലായിരുന്നു നിഖിൽ അന്ന് കളത്തിലിറങ്ങിയത് . എന്നാൽ  അന്തരിച്ച കോൺഗ്രസ് നേതാവും നടനുമായ എം എച്ച് അംബരീഷിന്റെ ഭാര്യ സുമലത അംബരീഷ് മത്സര രംഗത്തിറങ്ങിയതോടെ നിഖിൽ വിയർത്തു . സ്വതന്ത്ര സ്ഥാനാർത്ഥിയായി മത്സരിച്ച സുമലതയെ രഹസ്യമായും പരസ്യമായും കോൺഗ്രസ് പാർട്ടിയും സ്ഥാനാർഥിയെ നിർത്താതെ ബിജെപിയും പിന്തുണച്ചതോടെ നിഖിലിന്റെ പരാജയം ഉറപ്പായി. പരാജയത്തിന് ശേഷം പാർട്ടി സംഘാടനത്തിലും സിനിമയിലും ശ്രദ്ധ കേന്ദ്രീകരിക്കുകയായിരുന്നു അദ്ദേഹം. 

നിഖിലിന് അനുകൂലമാകുന്ന ഘടകങ്ങൾ 

രാമനഗര ജെഡിഎസിന്റെ ഉരുക്കുകോട്ടയാണ് . മുൻ പ്രധാനമന്ത്രി എച്ച് ഡി ദേവെഗൗഡയുടെ പൗത്രൻ , മുൻ മുഖ്യമന്ത്രി എച്ച് ഡി കുമാരസ്വാമിയുടെ മകൻ , ഗൗഡപരിവാർ പ്രതിനിധാനം ചെയ്യുന്ന വൊക്കലിഗ സമുദായത്തിന്റെ സ്വാധീന മേഖലയിലെ പോരാട്ടം, അമ്മ അനിത കുമാര സ്വാമിയുടെ സിറ്റിങ് സീറ്റാണെന്ന സുരക്ഷിതത്വം , ബെംഗളൂരു - മൈസൂരു അതിവേഗ പാതയിലെ ടോൾ പിരിവിനെതിരെ കർഷക സമരത്തിൽ പങ്കെടുത്ത് അറസ്റ്റ് വരിച്ചത്. നിഖിലിന് അനുകൂലമാകുന്ന ഘടകങ്ങൾ നിരവധിയാണ് . തിരഞ്ഞെടുപ്പ് പ്രചാരണത്തിൽ  ബഹുദൂരം മുന്നിലാണ് നിഖിൽ കുമാരസ്വാമി . 

ത്രികോണ മത്സരം മുറുകും 

രാമനഗര മണ്ഡലത്തിൽ നിഖിലിന്റെ പരാജയം ഉറപ്പാക്കാൻ കോൺഗ്രസ് ഇറക്കുന്നത്  ഇഖ്ബാൽ ഹുസൈനെയാണ് . മണ്ഡലത്തിലെ മുസ്ലിം ന്യൂനപക്ഷ വോട്ടുകൾ ജെഡിഎസിലേക്കു പോകാതെ നോക്കിയാൽ വിജയമുറപ്പിക്കാമെന്ന  കണക്കു കൂട്ടലിലാണ് ഇഖ്ബാൽ ഹുസൈനെ ഇറക്കിയിരിക്കുന്നത് . കോൺഗ്രസ് അധ്യക്ഷൻ ഡി കെ ശിവകുമാറും സഹോദരനും ബെംഗളൂരു റൂറൽ എം പിയുമായ ഡികെ സുരേഷും ഇക്‌ബാൽ ഹുസൈനായി വോട്ട് അഭ്യർത്ഥിച്ച് മണ്ഡലത്തിൽ പര്യടനം നടത്തിയിരുന്നു . മണ്ഡലത്തിലെ കോൺഗ്രസിന്റെ വൊക്കലിഗ വോട്ടുകൾ ചോർന്നുപോകാതെ നോക്കലാണ് ലക്ഷ്യം . 

ബിജെപിയെ സംബന്ധിച്ചിടത്തോളം വേരൂന്നാനുള്ള അവസരമാണ് രാമനഗരയിലെ മത്സരം . ഇതുവരെ സ്‌ഥാനാർഥി പ്രഖ്യാപനം നടന്നിട്ടില്ലെങ്കിലും സിൽക്ക് ഡെവലപ്മെന്റ് ബോർഡ്  ചെയർമാൻ ഗൗതം ഗൗഡയുടെ പേരാണ് ഉയർന്നു കേൾക്കുന്നത് . ബൊമ്മെ സർക്കാരിന്റെ ബജറ്റ് വാഗ്ദാനമായ ദക്ഷിണ അയോദ്ധ്യയാക്കാൻ പോകുന്ന രാമക്ഷേത്രം സ്ഥിതി ചെയ്യുന്ന സ്ഥലമാണ് മണ്ഡലം. ക്ഷേത്രത്തിന്റെ പേര് പറഞ്ഞാകും ബിജെപിയുടെ വോട്ടുപിടുത്തം . കേന്ദ്ര പദ്ധതിയായ ബെംഗളൂരു - മൈസൂരു അതിവേഗ പാതയുടെ അശാസ്ത്രീയ നിർമാണത്തെ ചൊല്ലി പ്രദേശത്തെ കർഷകർ സമരത്തിലാണെന്നത് ബിജെപിക്ക് തിരിച്ചടിയാണ് . എന്നിരുന്നാലും ലിംഗായത് - ദളിത് വോട്ടുകൾ തുണയ്ക്കുമെന്നതാണ് ആത്മവിശ്വാസം കൂട്ടുന്ന കാര്യം. 

നിഖിൽ കുമാരസ്വാമിയെ പരാജയപ്പെടുത്താൻ കോൺഗ്രസും ബിജെപിയും കൈകോർക്കുമോ എന്നതാണ് ഗൗഡ കുടുംബത്തെ അലട്ടുന്ന പ്രശ്നം . 2018ലെ സഖ്യസർക്കാർ നിലം പൊത്തിയതിന് ശേഷം കോൺഗ്രസും ജെഡിഎസും കീരിയും പാമ്പും പോലെയാണ് . പ്രത്യേകിച്ച്  കുമാരസ്വാമിയും ഡി കെ ശിവകുമാറും. രാമനഗരയിൽ ഡി കെ ശിവകുമാർ കോൺഗ്രസ് പ്രചാരണത്തിനിറങ്ങിയതോടെ കുടുംബ സമേതം നിഖിലിന് വേണ്ടി കളത്തിലിറങ്ങുകയാണ്  കുമാരസ്വാമി .