രാഹുൽ ഗാന്ധിക്കും സിദ്ധരാമയ്യക്കും ശിവകുമാറിനുമെതിരെ അപകീർത്തി കേസ്; സമൻസ് അയച്ച് കോടതി
കർണാടക ബിജെപി നൽകിയ അപകീർത്തി കേസിൽ മുഖ്യമന്ത്രി സിദ്ധരാമയ്യക്കും ഉപമുഖ്യമന്ത്രി ഡി കെ ശിവകുമാറിനും കോൺഗ്രസ് നേതാവ് രാഹുൽ ഗാന്ധിക്കുമെതിരെ സമൻസ് അയച്ച് കോടതി. ജനപ്രതിനിധികൾക്കെതിരെയുള്ള ക്രിമിനൽ കേസുകൾ പരിഗണിക്കുന്ന ബെംഗളൂരുവിലെ പ്രത്യേക കോടതിയാണ് സമൻസ് അയച്ചത്. കഴിഞ്ഞ മെയ് 9 നായിരുന്നു ബിജെപി സംസ്ഥാന സെക്രട്ടറി എസ് കേശവ പ്രസാദ് മൂവർക്കുമെതിരെ അപകീർത്തി കേസ് നൽകിയത്.
ബിജെപി എന്ന രാഷ്ട്രീയ പാർട്ടിയുടെ പ്രതിച്ഛായ മോശമാക്കുന്ന തരത്തിൽ വ്യാജ പ്രചാരണം നടത്തി പരസ്യങ്ങൾ മാധ്യമങ്ങളിലും മറ്റും പ്രസിദ്ധീകരിച്ചു എന്നാണ് ഇവർക്കെതിരെയുള്ള അപകീർത്തിക്കേസിൽ പറയുന്നത്. മെയ് 5 ന് വിവിധ മാധ്യമങ്ങളിൽ പ്രസിദ്ധീകരിച്ച തിരഞ്ഞെടുപ്പ് പരസ്യത്തിൽ ബിജെപി സർക്കാർ നാലുവർഷം കൊണ്ട് 1.5 ലക്ഷം കോടി രൂപ ഖജനാവ് കൊള്ളയടിച്ചെന്നായിരുന്നു കോൺഗ്രസിന്റെ ആക്ഷേപം. ഇത് അടിസ്ഥാന രഹിതവും മുൻവിധിയോടുകൂടിയുമുള്ള നീക്കമാണെന്നാണ് ഹർജിയിൽ പറയുന്നത്.
ഇന്ത്യൻ ശിക്ഷാ നിയമത്തിലെ 499, 500 വകുപ്പുകൾ ചുമത്തിയാണ് കോടതി കേസെടുത്തിരിക്കുന്നത്. ജൂലൈ 27 ന് നേരിട്ട് ഹാജരാകണമെന്നാവശ്യപ്പെട്ടാണ് സിദ്ധരാമയ്യയ്ക്കും ഡി കെ ശിവകുമാറിനും രാഹുൽ ഗാന്ധിക്കും ബെംഗളൂരു അഡീഷണൽ ചീഫ് മെട്രോ പൊളിറ്റൻ മജിസ്‌ട്രേറ്റ് കോടതിയുടെ സമൻസ്. മൂവരുടെയും വിശദമായ മൊഴി കോടതി രേഖപ്പെടുത്തും.
കർണാടകയിലെ മുൻ ബിജെപി സർക്കാരിനെ നാൽപത് ശതമാനം കമ്മീഷൻ സർക്കാരെന്ന് ആക്ഷേപിച്ചായിരുന്നു കോൺഗ്രസ് പരസ്യം നൽകിയിരുന്നത്. വോട്ടെടുപ്പ് ദിവസത്തിന് തൊട്ട് മുൻപുള്ള ദിവസങ്ങളിൽ സാമൂഹ്യ മാധ്യമങ്ങളിലൂടെയും കോൺഗ്രസ് ഇത്തരം പ്രചാരം നടത്തിയിരുന്നു.
