ഇഷ ഫൗണ്ടേഷനിൽ നിരവധി പേരെ കാണാതായെന്നു തമിഴ്നാട് പോലീസ്; കേസ് അവസാനിപ്പിച്ച് സുപ്രീംകോടതി
അനധികൃത തടങ്കല്‍ കേസില്‍, സദ്ഗുരു ജഗ്ഗി വാസുദേവിന്റെ നേതൃത്വത്തിലുള്ള ഇഷ ഫൗണ്ടേഷനെതിരായ നടപടികള്‍ അവസാനിപ്പിച്ച് സുപ്രീംകോടതി. കോയമ്പത്തൂരിലെ ഇഷ യോഗകേന്ദ്രത്തില്‍ തന്‌റെ രണ്ട് പെണ്‍മക്കളെ അനധികൃതമായി പാര്‍പ്പിച്ചിരിക്കുകയാണെന്ന് ആരോപിച്ച് പിതാവ് സമര്‍പ്പിച്ച ഹേബിയസ് കോര്‍പ്പസ് ഹര്‍ജി കോടതി തള്ളി. 42 ഉം 39ളം വയസ് പ്രായമായ മക്കള്‍ അവരുടെ സ്വന്തം ഇഷ്ടത്തിലാണ് ആശ്രമത്തില്‍ താമസിക്കുന്നതെന്നും കോടതി നിരീക്ഷിച്ചു.
ഇഷ യോഗകേന്ദ്രത്തില്‍ പോയ നിരവധി പേരെ കാണാതായിട്ടുണ്ടെന്ന് തമിഴ്നാട് പോലീസിന്റെ റിപ്പോര്‍ട്ട് തള്ളിക്കൊണ്ടാണ് കോടതി ഉത്തരവ്. ഇഷ യോഗകേന്ദ്രത്തില്‍ പോയ പലരെയും കണ്ടെത്താന്‍ സാധിച്ചിട്ടില്ലെന്നും ഇഷ ഫൗണ്ടേഷന്‍ ക്യാമ്പസ് പരിസരത്ത് ശ്മശാനമുണ്ടെന്നും പോലീസ് റിപ്പോര്‍ട്ടിലുണ്ട്.
വിഷയം അവസാനിപ്പിക്കുന്നതിനിടയില്‍, ഹേബിയസ് കോര്‍പ്പസ് ഹര്‍ജിയില്‍ ഇഷ യോഗാ സെന്‌ററിനെതിരായ മറ്റ് ആരോപണങ്ങളില്‍ പോലീസ് അന്വേഷണത്തിനുള്ള മദ്രാസ് ഹൈക്കോടതി നിര്‍ദേശം സുപ്രീംകോടതി ഒഴിവാക്കി.
''ഇവരുവരും പ്രായപൂര്‍ത്തിയായവരായതിനാലും ഹേബിയസ് കോര്‍പ്പസിന്‌റെ ഉദ്ദേശ്യം പൂര്‍ത്തീകരിക്കപ്പെട്ടതിനാലും ഹൈക്കോടതിയില്‍നിന്ന് കൂടുതല്‍ നിര്‍ദേശങ്ങള്‍ ആവശ്യമില്ല,'' ചീഫ് ജസ്റ്റിസ് ഡി വൈ ചന്ദ്രചൂഡ്, ജസ്റ്റിസ് ജെ ബി പര്‍ദിവാല, മനോജ് മിശ്ര എന്നിവരടങ്ങിയ ബെഞ്ച് ഉത്തരവില്‍ ചൂണ്ടിക്കാട്ടി.
നടപടിക്രമങ്ങള്‍ സ്ഥാപനങ്ങളെയും വ്യക്തികളെയും അപകീര്‍ത്തിപ്പെടുത്താന്‍ കഴിയില്ലെന്നു വാദത്തിനിടെ ചീഫ് ജസ്റ്റിസ് വാക്കാല്‍ പറഞ്ഞു.
മദ്രാസ് ഹൈക്കോടതിയില്‍നിന്നുള്ള ഹേബിയസ് കോര്‍പസ് ഹർജി സുപ്രീംകോടതിയിലേക്കു മാറ്റുകയായിരുന്നു. അയ്യായിരം പേര്‍ താമസിക്കുന്ന ആശ്രമത്തില്‍ പോലീസ് അന്വേഷണം നടത്താന്‍ നിര്‍ദേശിച്ച മദ്രാസ് ഹൈക്കോടതിയുടെ ഉത്തരവ് ചോദ്യം ചെയ്ത് ഇഷ ഫൗണ്ടേഷന്‍ സുപ്രീംകോടതിയെ സമീപിക്കുകയായിരുന്നു.
24, 27 വയസ്സുള്ളപ്പോള്‍ സ്ത്രീകള്‍ സ്വമേധയാ ആശ്രമത്തില്‍ ചേര്‍ന്നതാണെന്നും നിയമവിരുദ്ധമായി തടവിലാക്കപ്പെട്ടുവെന്ന അവകാശവാദങ്ങള്‍ അടിസ്ഥാനരഹിതമാണെന്നും ഇഷ ഫൗണ്ടേഷനെ പ്രതിനിധീകരിച്ച് മുതിര്‍ന്ന അഭിഭാഷകന്‍ മുകുള്‍ റോത്തഗിയുടെ വാദം.
രണ്ട് സ്ത്രീകളുമായുള്ള വെര്‍ച്വല്‍ ആശയവിനിമയത്തിന് ശേഷം, കോടതി രണ്ട് സ്ത്രീകളോടും സംസാരിക്കുകയും അവരുടെ മൊഴികള്‍ രേഖപ്പെടുത്തുകയും ചെയ്തുവെന്ന് ചീഫ് ജസ്റ്റിസ് ചന്ദ്രചൂഡ് പറഞ്ഞു. സ്വന്തം ഇഷ്ടപ്രകാരമാണ് ആശ്രമത്തില്‍ താമസിക്കുന്നതെന്ന് രണ്ട് സ്ത്രീകളും മൊഴി നല്‍കിയതോടെ കേസ് പിന്‍വലിക്കണമായിരുന്നുവെന്ന് അദ്ദേഹം വ്യക്തമാക്കി.
