സിപിഐ നേതാവും നാഗപട്ടണം എംപിയുമായ എം സെല്‍വരാജ് അന്തരിച്ചു
തമിഴ്നാട്ടിലെ സിപിഐ നേതാവും നാഗപട്ടണം എംപിയുമായ എം സെല്‍വരാജ് (67) അന്തരിച്ചു. രോഗബാധിതനായി ചെന്നൈയിലെ സ്വകാര്യ ആശുപത്രിയില്‍ ചികിത്സയിലിരിക്കെയാണ് അന്ത്യം.
നാഗപട്ടണത്തെ ലോക്‌സഭയിൽ നാലു തവണ പ്രതിനിധീകരിച്ചിട്ടുണ്ട്. 1989, 1996, 1998, 2019 വര്‍ഷങ്ങളില്‍ അദ്ദേഹം ലോക്‌സഭയിലേക്ക് തിരഞ്ഞെടുക്കപ്പെട്ടു. വൃക്കസംബന്ധമായ രോഗങ്ങള്‍ കാരണം ഇത്തവണ മത്സരത്തില്‍നിന്ന് പിന്മാറിയിരുന്നു.
തമിഴ്‌നാട്ടില്‍ ഇടതുപക്ഷത്തിനു ശക്തമായ വേരോട്ടമുള്ള പ്രദേശമാണ് നാഗപട്ടണം. എം സെല്‍വരാജിന്റെ മരണത്തില്‍ തമിഴ്‌നാട് മുഖ്യമന്ത്രി എം കെ സ്റ്റാലിന്‍, സിപിഐ ജനറല്‍ സെക്രട്ടറി ഡി രാജ തുടങ്ങിയവര്‍ അനുശോചിച്ചു. സംസ്‌കാരം നാളെ രാവിലെ 10നു കൊട്ടൂരില്‍ നടക്കും.
ഇത്തവണയും നാഗപട്ടണത്ത് സിപിഐയാണ് ഇന്ത്യ മുന്നണിയ്ക്കു‌വേണ്ടി മത്സരിക്കുന്നത്. വി സെല്‍വരാജാണ് സ്ഥാനാര്‍ഥി. മണ്ഡലത്തില്‍ എഐഎഡിഎംകെയാണ് മുന്നണിയുടെ പ്രധാന എതിരാളി. ബിജെപി സ്ഥാനാര്‍ഥിയും മത്സരരംഗത്തുണ്ട്.
