ഹരിയാനയിൽ രണ്ടാം റൗണ്ട് ട്വിസ്റ്റ്; കേവലഭൂരിപക്ഷത്തിലേക്ക് കുതിച്ച് ബിജെപി, അമ്പരന്ന് കോണ്‍ഗ്രസ്
ഹരിയാനയിൽ വോട്ടെണ്ണൽ രണ്ടാം ഘട്ടത്തിലേക്ക് കടക്കുമ്പോൾ തിരഞ്ഞെടുപ്പ് ഫലങ്ങൾ മാറിമറിയുകയാണ്. ആദ്യഘട്ടത്തിൽ 74 സീറ്റുകൾ എന്ന വലിയ ഭൂരിപക്ഷത്തിലേക്ക് കോൺഗ്രസ് പോയെങ്കിലും വോട്ടെണ്ണൽ ഒന്നരമണിക്കൂർ പിന്നിട്ടപ്പോൾ ബിജെപി തിരിച്ചുവരുകയായിരുന്നു. 14 സീറ്റുകളിലെ ലീഡ് ബിജെപി 46 ലേക്ക് ഉയർത്തിയപ്പോൾ കോൺഗ്രസിന്റെ മുന്നേറ്റം 35ൽ താഴെ സീറ്റുകളിലേക്ക് താഴ്ന്നു.
കർഷകരോഷം, തൊഴിലില്ലായ്മ, അഗ്നിവീർ പദ്ധതിക്കെതിരെയുള്ള പ്രതിഷേധം ഉൾപ്പെടെ നിരവധി വിഷയങ്ങളിൽ പത്ത് വർഷമായി ഭരണത്തിലുള്ള ബിജെപി സർക്കാർ ഭരണവിരുദ്ധവികാരം നേരിടുമ്പോഴാണ് അവരുടെ തിരിച്ചുവരവ്. കോൺഗ്രസിന് എല്ലാ നിലയ്ക്കും ഭദ്രമെന്ന് കരുതിയിരുന്ന സംസ്ഥാനമാണ് ഹരിയാന. എക്സിറ്റ് പോളുകൾ കോൺഗ്രസിന്റെ ജയം പ്രവചിച്ചിരുന്നു.
നിലവിലെ മാറിമറിയലുകൾ നൈമിഷകമാണെന്നും അന്തിമവിജയം കോൺഗ്രസിന് ആയിരിക്കുമെന്നാണ് കോൺഗ്രസ് നേതാവ് കുമാരി ഷെൽജ പ്രതികരിച്ചത്. അറുപതിലധികം സീറ്റുകൾ കോൺഗ്രസ് നേടുമെന്നും ഫലത്തിലെ മാറിമറിയലുകൾക്ക് ശേഷവും ഷെൽജ പറഞ്ഞു. അതേസമയം, രാവിലെ തന്നെ ആരംഭിച്ച കോൺഗ്രസ് പ്രവർത്തകരുടെ ആഘോഷപ്രകടനങ്ങൾ നിർത്തിവച്ചിരിക്കുകയാണ്.
തിരിച്ചടികൾക്കിടയിലും ആത്മവിശ്വാസം പ്രകടിപ്പിച്ചായിരുന്നു കോൺഗ്രസ് നേതാവ് ഭൂപീന്ദർ ഹൂഡയുടെയും പ്രതികരണം. അന്തിമനേട്ടം കോൺഗ്രസിന് തന്നെയെന്നാണ് അദ്ദേഹവും പറഞ്ഞത്.
