കേന്ദ്രമന്ത്രി നിതിൻ ഗഡ്കരിക്ക് വധഭീഷണി; സുരക്ഷ വർധിപ്പിച്ചു

കേന്ദ്രമന്ത്രി നിതിൻ ഗഡ്കരിക്ക് വധഭീഷണി. ഗഡ്കരിയുടെ നാഗ്പൂരിലെ ഓഫീസിലെ ലാന്‍ഡ്‌ലൈന്‍ ഫോണിലേക്കാണ് വധഭീഷണി മുഴക്കികൊണ്ടുള്ള കോളെത്തിയത്. ദാവൂദ് ഇബ്രാഹിമിന്റെ സംഘാംഗമാണെന്നും 100 കോടി നൽകിയില്ലെങ്കിൽ ഗഡ്കരിയെ വധിക്കുമെന്നുമായിരുന്നു ഭീഷണി. ഓഫീസ് ജീവനക്കാരാണ് ഫോൺ എടുത്തത്. സംഭവത്തില്‍ അന്വേഷണം പുരോഗമിക്കുകയാണെന്ന് നാഗ്പൂർ പോലീസ് അറിയിച്ചു. 

ശനിയാഴ്ച രാവിലെ 11.30-നും 11.40-നും ഇടയിലാണ് സംഭവം. ഗഡ്കരിയുടെ ഓഫീസ് സ്‌ഫോടനത്തില്‍ തകര്‍ക്കുമെന്നും അജ്ഞാതന്‍ ഭീഷണി മുഴക്കി. കര്‍ണാടകയിലെ ഹബ്ലിയില്‍ നിന്നാണ് ഫോണ്‍ കോളെത്തിയത് എന്നാണ് വിവരം. ഭീഷണിയെ തുടർന്ന് മന്ത്രിയുടെ z പ്ലസ് കാറ്റഗറി സുരക്ഷ വര്‍ധിപ്പിച്ചിട്ടുണ്ടെന്ന് ഉദ്യോഗസ്ഥര്‍ അറിയിച്ചു. മകര സംക്രാന്തി ആഘോഷങ്ങളില്‍ പങ്കെടുക്കുന്നതിന്‍റെ ഭാഗമായി ഗഡ്കരി നിലവില്‍ നാഗ്പൂരിലാണുള്ളത്.