'തെക്കും വടക്കും ഒന്നാണ്'; സുധാകരന് ആര്യാ രാജേന്ദ്രന്റെ സചിത്ര മറുപടി
തെക്കന്‍ കേരളത്തിലെ രാഷ്ട്രീയക്കാരെ പരിഹസിച്ച കെപിസിസി അധ്യക്ഷന്‍ കെ സുധാകരന്റെ പരാമര്‍ശത്തിന് മറുപടിയുമായി തിരുവനന്തപുരം മേയര്‍ ആര്യാ രാജേന്ദ്രന്‍. ബാലുശ്ശേരി എംഎല്‍എയും ഭര്‍ത്താവുമായ കെ എം സച്ചിന്‍ദേവിനൊപ്പമുള്ള ചിത്രം ഫേസ്ബുക്കില്‍ പങ്കുവെച്ചുകൊണ്ടാണ് ആര്യയുടെ വിമര്‍ശനം. 'തെക്കും വടക്കും ഒന്നാണ്' എന്ന തലക്കെട്ടോടെയാണ് ചിത്രം പങ്കുവെച്ചിരിക്കുന്നത്.
ബാലുശ്ശേരി എംഎല്‍എ കെ എം സച്ചിന്‍ദേവും തിരുവനന്തപുരം മേയര്‍ ആര്യാ രാജേന്ദ്രനും സെപ്റ്റംബര്‍ നാലിനാണ് വിവാഹിതരായത്. മേയര്‍ പങ്കുവെച്ച ചിത്രത്തിന് മികച്ച പ്രതികരണവും പിന്തുണയുമാണ് ജനങ്ങളുടെ ഭാഗത്ത് നിന്ന് ലഭിക്കുന്നത്. സുധാകരന് ഇതിലും മികച്ച മറുപടി സ്വപ്‌നങ്ങളില്‍ മാത്രം എന്ന പരിഹാസവും കമെന്റ് ബോക്‌സില്‍ നിറയുന്നുണ്ട്.
ദ ന്യൂ ഇന്ത്യന്‍ എക്‌സ്പ്രസിന് നല്‍കിയ അഭിമുഖത്തിലാണ് തെക്ക് വടക്ക് രാഷ്ട്രീയത്തെ കുറിച്ചുള്ള ചോദ്യത്തിന് തെക്കന്‍ കേരളത്തിലെ രാഷ്ട്രീയക്കാരെ സുധാകരന് പരിഹസിച്ചത്. രാമായണ കഥയെ തന്റെ രീതിയില്‍ വ്യാഖ്യാനിച്ച് പരിഹാസരൂപേണ കഥ പറഞ്ഞുകൊണ്ടായിരുന്നു തെക്കന്‍ കേരളത്തിലെയും മലബാറിലെയും രാഷ്ട്രീയക്കാര്‍ തമ്മില്‍ ചരിത്രപരമായ വ്യത്യാസങ്ങളുണ്ടെന്ന് സുധാകരന് പറഞ്ഞത്.
പരാമര്‍ശത്തില്‍ ശക്തമായ വിമര്‍ശനമാണ് ഉയര്‍ന്നത്. സുധാകരന് എന്തും പറയാമെന്നും അതിനെതിരെ ഒന്നും പറയാനില്ലെന്നുമായിരുന്നു ശശി തരൂരിന്റെ പ്രതികരണം. 46 വര്‍ഷം പാരമ്പര്യമുള്ള ട്രെയിനിയാണ് താന്‍ എന്നും അദ്ദേഹം കൂട്ടിച്ചേര്‍ത്തു.
