'എന്താണ് സംഭവിച്ചതെന്ന് പോലും അറിയില്ല'; മധു വധക്കേസില്‍ 36-ാം സാക്ഷിയും കൂറുമാറി
അട്ടപ്പാടി മധുക്കേസില്‍ കൂറുമാറ്റം തുടരുന്നു. 36ാം സാക്ഷി അബ്ദുള്‍ ലത്തീഫാണ് ഇന്ന് കൂറുമാറിയത്. ഇതോടെ കൂറുമാറിയ സാക്ഷികളുടെ എണ്ണം 21 ആയി. മധുവിന് എന്താണ് സംഭവിച്ചതെന്നും പോലും തനിക്ക് അറിയില്ലെന്നായിരുന്നു 36ാം സാക്ഷി ഇന്ന് കോടതിയില്‍ അറിയിച്ചത്.
കോടതിയില്‍ ഇന്നും മധുവിന് എതിരായ ആള്‍ക്കൂട്ട ആക്രമണ ദൃശ്യങ്ങള്‍ പ്രദര്‍ശിപ്പിച്ചിരുന്നു. എന്നാല്‍ ദൃശ്യങ്ങളില്‍ കാണുന്നത് താന്‍ അല്ലെന്നായിരുന്നു അബ്ദുള്‍ ലത്തീഫ് മൊഴി നല്‍കിയത്. മധുവിനെ അറിയാമെന്നും എന്നാല്‍ പ്രതികളെ ചൂണ്ടിക്കാണിച്ചപ്പോള്‍ അറിയില്ലെന്നുമായിരുന്നു മൊഴി.
ദൃശ്യങ്ങളിൽ കാണുന്നത് താനല്ലെന്ന് അബ്ദുൾ ലത്തീഫ് കോടതിയിൽ
മധുവിന്റെ സഹോദരി, സഹോദരി ഭര്‍ത്താവ് എന്നിവരെയും ഇന്ന് കോടതി വിസ്തരിക്കും. അതേ സമയം കഴിഞ്ഞ ദിവസം കൂറുമാറിയ സുനില്‍കുമാറിനെതിരെ നടപടി സ്വീകരിക്കണമെന്നാവശ്യപ്പെട്ട് പ്രോസിക്യൂഷന്‍ നല്‍കിയ ഹര്‍ജിയും ഇന്ന് കോടതിയുടെ പരിഗണനയിലെത്തും.
