അല്‍ഫാമിനായി കൂട്ടത്തല്ല്, ഹോട്ടല്‍ ജീവനക്കാര്‍ക്ക് പരുക്ക്
അല്‍ഫാം കിട്ടാന്‍ സമയം വൈകി, കോഴിക്കോട് തിരുവമ്പാടിയില്‍ ഹോട്ടലില്‍ കൂട്ടയടി. അഞ്ച് മിനിറ്റ് കൊണ്ട് അല്‍ഫാം നല്‍കണമെന്നാവശ്യപ്പെട്ട് എത്തിയ യുവാക്കള്‍ ഹോട്ടല്‍ ജീവനക്കാരെ മര്‍ദിച്ചു. തിരുവമ്പാടി പുല്ലൂരാംപാറ ഇലന്തുകടവിലെ ന്യൂ മലബാര്‍ എക്‌സ്പ്രസ്സ് ഹോട്ടലില്‍ ഇന്നലെ രാത്രി 10 മണിയോടെ ആണ് സംഭവം.
5 മിനിറ്റ് കൊണ്ട് ഓര്‍ഡര്‍ ചെയ്ത അല്‍ഫാം വേണം എന്ന് പറഞ്ഞപ്പോള്‍ 15 മിനിറ്റ് ആകും എന്ന് പറഞ്ഞതിന് ജീവനക്കാരെ അസഭ്യം പറയുകയും മര്‍ദിക്കുകയും ചെയ്തത് എന്നാണ് പരാതി. യുവാക്കളുടെ മര്‍ദ്ദനത്തില്‍ മൂന്ന് ഹോട്ടല്‍ ജീവനക്കാര്‍ക്ക് പരുക്കേറ്റു.
സംഭവത്തില്‍ ഏഴ് പേര്‍ക്കെതിരെ ഹോട്ടല്‍ ഉടമകള്‍ പോലീസില്‍ പരാതി നല്‍കി. ഹോട്ടലുടമ തങ്ങളെ മര്‍ദിച്ചതായി യുവാക്കളും പരാതി നല്‍കിയിട്ടുണ്ട്. തിരുവമ്പാടി പോലീസ് അന്വേഷണം ആരംഭിച്ചു. മര്‍ദനത്തിന്റെ സിസിടിവി ദൃശ്യങ്ങള്‍ പുറത്തുവന്നു.
