കണ്ണൂരില്‍ കാറില്‍ ചാരിനിന്ന കുട്ടിയെ ചവിട്ടിയ സംഭവം: പ്രതിയുടെ ജാമ്യാപേക്ഷ തള്ളി
കണ്ണൂരില്‍ കാറില്‍ ചാരി നിന്നതിന് ആറുവയസുകാരനെ ചവിട്ടിയ കേസിലെ പ്രതി പൊന്ന്യംപാലം സ്വദേശി ശിഹ്ഷാദിന്റെ ജാമ്യാപേക്ഷ കോടതി തള്ളി. തലശേരി സിജെഎം കോടതിയാണ് പ്രതിയുടെ ജാമ്യാപേക്ഷ തള്ളിയത്. രാജസ്ഥാനി കുടുംബത്തിലെ ഗണേഷെന്ന കുട്ടിയെ മര്‍ദിച്ച കേസിലാണ് നടപടി. പ്രതിക്കെതിരെ വധശ്രമം, ഗതാഗതം തടസപ്പെടുത്തല്‍, ബോധപൂര്‍വം പരുക്കേല്‍പ്പിക്കല്‍ തുടങ്ങിയ വകുപ്പുകളാണ് ചുമത്തിയിരിക്കുന്നത്.
നവംബര്‍ മൂന്നിന് രാത്രി എട്ടോടെ തലശേരി പഴയ ബസ് സ്റ്റാന്‍ഡിന് സമീപം മണവാട്ടി ജംഗ്ഷനിലായിരുന്നു സംഭവം. കാര്‍ നിര്‍ത്തിയ ശേഷം ശിഹ്ഷാദ് കടയിലേക്ക് പോയ സമയത്താണ് ഗണേഷ് കാറില്‍ ചാരി നിന്നത്. പ്രകോപിതനായ പ്രതി കുട്ടിയെ ചവിട്ടി. സംഭവത്തില്‍ പോലീസ് കേസെടുക്കാന്‍ വൈകിയതിനെതിരെയും വലിയ ആക്ഷേപമുയര്‍ന്നിരുന്നു.
സംഭവം നടന്നയുടന്‍ തന്നെ പോലീസ് ശിഹ്ഷാദിനെ സ്‌റ്റേഷനിലെത്തിച്ചെങ്കിലും അറസ്റ്റ് രേഖപ്പെടുത്തിയിരുന്നില്ല. പിറ്റേദിവസം രാവിലെ സ്റ്റേഷനിലെത്താനാണ് ആവശ്യപ്പെട്ടത്. നടുവിന് സാരമായി പരുക്കേറ്റ കുട്ടി തലശേരി ആശുപത്രിയില്‍ ചികിത്സയിലായിരുന്നു. ബാലാവകാശ കമ്മീഷനടക്കം സംഭവത്തില്‍ ഇടപെട്ടിരുന്നു.
