ഹിന്ദു കോണ്‍ക്ലേവിന്റെ പോസ്റ്ററില്‍ മുഖ്യമന്ത്രിയുടെ മാധ്യമോപദേശകന്‍; ഒരു മത പാര്‍ലമെന്റിലും ഇല്ലെന്ന് പ്രഭാവര്‍മ
സംഘപരിവാർ അനുഭാവികള്‍ സംഘടിപ്പിക്കുന്ന ഹിന്ദു കോണ്‍ക്ലേവിന്റെ പോസ്റ്ററില്‍ മുഖ്യമന്ത്രിയുടെ മാധ്യമോപദേശകനും കവിയുമായ പ്രഭാവര്‍മയും. പോസ്റ്റര്‍ ഇറക്കിയതിനു പിന്നാലെ കോണ്‍ക്ലേവിനെ തള്ളി പ്രഭാവര്‍മ രംഗത്തുവന്നു. താന്‍ ഒരു മത പാര്‍ലമെന്റിലും ഇല്ലെന്നും, മതവിശ്വാസിയോ ദൈവ വിശ്വാസിയോ പോലുമല്ലെന്നും അദ്ദേഹം ഫേസ്ബുക്കില്‍ കുറിച്ചു. അതേസമയം, പരിപാടിയില്‍ പങ്കെടുക്കുന്ന പ്രമുഖരുടെ വിവരങ്ങളുള്ള ബ്രോഷറിലും നോട്ടീസിലും പ്രഭാവർമയുടെ പേരില്ല. പോസ്റ്ററില്‍ മാത്രമാണ് പ്രഭാ വർമയുടെ പേരും ഫോട്ടോയുമുള്ളത്. ജനുവരി 28ന് തിരുവനന്തപുരത്താണ് ഹിന്ദു കോൺക്ലേവ് സംഘടിപ്പിക്കുന്നത്.
പരിപാടിയില്‍ പങ്കെടുക്കുന്ന വിശിഷ്ടാതിഥികളുടെ കൂടെയാണ് പ്രഭാവര്‍മയുടെ ചിത്രവും പേരും പ്രത്യക്ഷപ്പെട്ടത്. കേരളാ ഗവര്‍ണര്‍ ആരിഫ് മുഹമ്മദ് ഖാന്‍ ഉദ്ഘാടനം നിര്‍വഹിക്കുന്ന പരിപാടിയില്‍ ധാരാളം പ്രമുഖര്‍ പങ്കെടുക്കുന്നുണ്ട്. സമാപന സമ്മേളനം കേന്ദ്രമന്ത്രി വി മുരളീധരന്‍ ഉദ്ഘാടനം ചെയ്യും.
ശ്രീകുമാരന്‍ തമ്പി, അടൂര്‍ ഗോപാലകൃഷ്ണൻ, കൈതപ്രം ദാമോദരന്‍ നമ്പൂതിരി, നടന്‍ ഉണ്ണി മുകുന്ദന്‍, നടി അനുശ്രീ, വി മധൂസൂദനന്‍ നായര്‍, ബി മാധവന്‍ നായര്‍, കുമ്മനം രാജശേഖരൻ, കെ പി ശശികല തുടങ്ങി നിരവധി പേർ പരിപാടിയില്‍ പങ്കെടുക്കുന്നുണ്ട്.
