വ്യവസായ സ്ഥാപനത്തിന് നഗരസഭ പൂട്ടിട്ടു; ദമ്പതികള്‍ നാടുവിട്ടു
തലശ്ശേരി നഗരസഭ വ്യവസായ സ്ഥാപനം പൂട്ടിച്ചതിനെ തുടർന്ന് ഉടമകളായ ദമ്പതികള്‍ നാടുവിട്ടു . തലശ്ശേരിയിലെ ഫാന്‍സി ഫര്‍ണിച്ചര്‍ ഉടമ രാജ് കബീറിനേയും ഭാര്യ ശ്രീദിവ്യയേയുമാണ് കാണാതായത്. തലശ്ശേരി നഗരസഭക്കെതിരെ കത്തെഴുതി വെച്ചാണ് ഇരുവരും നാടു വിട്ടത്. എഴുത്തുകാരന്‍ കെ.തായാട്ടിന്റെ മകനേയും ഭാര്യയേയുമാണ് കാണാതായത്.
ഭൂമി കയ്യേറി എന്നാരോപിച്ച് ഒരു മാസം മുന്‍പ് രാജ് കബീറിന്റെ ഫര്‍ണിച്ചര്‍ കട തലശ്ശേരി നഗരസഭ പൂട്ടിച്ചിരുന്നു. നഗരസഭയില്‍നിന്ന് കൊടിയ പീഡനമാണ് നേരിട്ടതെന്നും ഇതിന്റെ വിഷമത്തിലാണ് ഇരുവരും നാടു വിട്ടതെന്നും രാജ് കബീറിന്റെ സഹോദരന്‍ രാജേന്ദ്ര തായാട്ട് പറയുന്നു. ഇവരെ കുറിച്ചുള്ള സൂചന ലഭിച്ചതായി പോലീസ് അറിയിച്ചു
കെട്ടിടത്തിന് മുന്നില്‍ ഷീറ്റ് ഇട്ടതില്‍ നഗരസഭ ഇവരുടെ സ്ഥാപനത്തിനെതിരെ നാലര ലക്ഷം രൂപ പിഴയടക്കാന്‍ നോട്ടീസ് നല്‍കിയിരുന്നു. എന്നാല്‍ ഇതിനെതിരെ സ്ഥാപന ഉടമകള്‍ ഹൈക്കോടതിയെ സമീപിച്ചു. കോടതിയില്‍ നിന്നും അനുകൂല ഉത്തരവ് ഉണ്ടായിട്ടും നഗരസഭ സ്ഥാപനം തുറക്കാന്‍ അനുവദിച്ചിട്ടില്ലെന്നും ഇതില്‍ മനം മടുത്താണ് ദമ്പതിമാര്‍ നാടുവിട്ടതെന്നുമാണ് ബന്ധുക്കള്‍ പറയുന്നത്.നഗരസഭയുടെ നിരന്തര പീഡനം കാരണം മുന്നോട്ട് പോകാനാകുന്നില്ലെന്നാണ് കത്തില്‍ രാജ് കബീര്‍ എഴുതിയിട്ടുണ്ട്.
