മഞ്ചേരിയില്‍ വ്യാജ നോട്ടുകള്‍ തോട്ടില്‍ ഉപേക്ഷിച്ച നിലയില്‍
മലപ്പുറം മഞ്ചേരിയില്‍ 500 രൂപയുടെ വ്യാജ നോട്ടുകള്‍ ഉപേക്ഷിച്ച നിലയില്‍ കണ്ടെത്തി. മേലാക്കം നെല്ലിപറമ്പ് റോഡിനോട് ചേര്‍ന്നുള്ള കവുങ്ങിന്‍ തോട്ടത്തിലെ വെള്ളക്കെട്ടിലാണ് നോട്ടുകള്‍ കണ്ടത്. ഇതുവഴി നടന്നുപോവുകയായിരുന്ന സ്ത്രീയാണ് നോട്ടുകള്‍ വെള്ളത്തിലൂടെ ഒഴുകുന്നത് കണ്ടത്. ഉടന്‍ തന്നെ പ്രദേശവാസികളെ വിവരം അറിയിക്കുകയായിരുന്നു. ഇവര്‍ സ്ഥലത്തെത്തി വെള്ളത്തിലിറങ്ങി പരിശോധന നടത്തിയതോടെ പ്ലാസ്റ്റിക് കവറില്‍ കെട്ടിയ കൂടുതല്‍ നോട്ടുകെട്ടുകള്‍ കണ്ടെത്തുകയായിരുന്നു. മഞ്ചേരി പോലീസ് സ്ഥലത്തെത്തി പരിശോധന നടത്തി.
പോലീസ് പരിശോധനയില്‍ കൂടുതല്‍ നോട്ടുകള്‍ പരിസരത്ത് നിന്നും ലഭിച്ചു. ചില നോട്ടുകള്‍ കത്തിച്ച നിലയിലുമാണ്. 6AA223365 എന്ന സീരീസ് നമ്പറിലുള്ള ഒരേ നോട്ടുകളാണ് കണ്ടെടുത്തതെന്ന് പോലീസ് പറഞ്ഞു. നോട്ടുകള്‍ ഉണക്കിയ ശേഷമെ, എണ്ണിത്തിട്ടപ്പെടുത്താനാകൂ എന്ന് പോലീസ് അറിയിച്ചു. അതേസമയം എവിടെ നിന്നാണ് വ്യാജനോട്ടുകള്‍ തോട്ടില്‍ എത്തിയത്, ആരാണ് ഉപേക്ഷിച്ചത് ഉള്‍പ്പെടെയുള്ള കാര്യങ്ങള്‍ മഞ്ചേരി പോലീസ് അന്വേഷിച്ച് വരികയാണ്.
