ഗവര്‍ണര്‍-വി സി പോര്: ഇന്ന് നിര്‍ണായക ദിനം, ഹര്‍ജികളില്‍ ഹൈക്കോടതിയില്‍ വിശദമായ വാദം
ഗവര്‍ണറുടെ കാരണം കാണിക്കല്‍ നോട്ടീസിനെതിരെ വൈസ് ചാന്‍സലര്‍മാര്‍ നല്‍കിയ ഹര്‍ജികള്‍ ഹൈക്കോടതി ഇന്ന് പരിഗണിക്കും. കണ്ണൂര്‍ സര്‍വകലാശാല വി സി ഡോ. ഗോപിനാഥ് രവീന്ദ്രന്‍, മുന്‍ കേരള സര്‍വകലാശാല വി സി മഹാദേവന്‍ പിള്ള ഉള്‍പ്പെടെ ഏഴ് വി സിമാര്‍ നല്‍കിയാണ് ഹര്‍ജികളാണ് കോടതി പരിഗണിക്കുക. ചാന്‍സലറായ ഗവര്‍ണര്‍ ആരിഫ് മുഹമ്മദ് ഖാന്‍ ഉള്‍പ്പെടെ എതിര്‍ കക്ഷികള്‍ ഇന്ന് വിശദീകരണം സമര്‍പ്പിച്ചേക്കും.
കാരണം കാണിക്കല്‍ നോട്ടീസ് നിയമ വിരുദ്ധമാണെന്നും അതിനാല്‍ റദ്ദാക്കണമെന്നുമാണ് ഹര്‍ജിക്കാരുടെ ആവശ്യം. നടപടി ക്രമങ്ങള്‍ പൂര്‍ത്തീകരിക്കാതെയാണ് നോട്ടീസ് അയച്ചതെന്നാണ് വാദം. നേരത്തെ വി സിമാര്‍ സമര്‍പ്പിച്ച ഹര്‍ജിയില്‍ കാരണം കാണിക്കല്‍ നോട്ടീസിന് മറുപടി നല്‍കാന്‍ അവസരം നല്‍കണമെന്ന് കോടതി നിര്‍ദേശിച്ചിരുന്നു. എന്നാല്‍ മറുപടി നല്‍കാതെ വി സിമാര്‍ വീണ്ടും കോടതിയെ സമീപിക്കുകയായിരുന്നു. ഗവര്‍ണറുടെ നോട്ടീസിന് മറുപടി നല്‍കുകയല്ലേ വേണ്ടതെന്ന് കഴിഞ്ഞദിവസം കോടതി വാക്കാല്‍ ചോദിച്ചിരുന്നു.
അതേസമയം ഗവര്‍ണറുടെ കാരണം കാണിക്കല്‍ നോട്ടീസിന്മേല്‍ മറുപടി നല്‍കാനുള്ള കാലാവധി ഇന്ന് അവസാനിക്കും. അതിനിടെയാണ് നോട്ടീസ് റദ്ദാക്കണം എന്നാവശ്യപ്പെട്ട് വി സിമാര്‍ ഹൈക്കോടതിയെ സമീപിച്ചത്. നോട്ടീസ് നടപടിക്രമം പാലിച്ചിട്ടുണ്ടോ എന്നതടക്കമുള്ള കാര്യങ്ങളാണ് ജസ്റ്റിസ് ദേവന്‍ രാമചന്ദ്രന്റെ ബെഞ്ച് പരിശോധിക്കുക.
കണ്ണൂര്‍, കേരള, എംജി, കാലിക്കറ്റ്, ഫിഷറീസ്, മലയാളം, കേരള ശാസ്ത്ര സാങ്കേതിക സര്‍വകലാശാല, കാലടി സംസ്കൃത സര്‍വകലാശാല, കുസാറ്റ് സര്‍വകലാശാലകളിലെ വിസിമാരോടാണ് ഗവർണർ രാജി ആവശ്യപ്പെട്ടത്. രാജി വെക്കില്ലെന്ന് വിസിമാർ നിലപാടെടുത്തതോടെ ഗവർണർ കാരണം കാണിക്കല്‍ നോട്ടീസ് അയക്കുകയായിരുന്നു.
