കൃത്രിമ ഗർഭധാരണത്തിനുള്ള പ്രായപരിധി പുനഃപരിശോധിക്കണം; കേന്ദ്ര സര്‍ക്കാരിനോട് ഹൈക്കോടതി
കൃത്രിമ ഗർഭധാരണത്തിനായി നിശ്ചയിച്ച പ്രായപരിധി പുനഃപരിശോധിക്കാൻ ഹൈക്കോടതി നിർദേശം. പ്രായപരിധി നിഷ്കർഷിക്കുന്ന എആര്‍ടി ആക്ടിലെ വകുപ്പ് 21 (ജി) പുനഃപരിശോധിക്കാനാണ് കോടതി നിര്‍ദേശം നല്‍കിയത്. ചികിത്സ തുടരുന്നവർക്ക് പ്രായപരിധിയുടെ വിലക്കില്ലാതെ പൂർത്തിയാക്കുവാൻ അനുവദിക്കുന്ന ഒരു വകുപ്പ് വേണമോ എന്ന് പരിശോധിക്കാനും കേരള ഹൈക്കോടതി കേന്ദ്ര സർക്കാരിനോട് ആവശ്യപ്പെട്ടു.
അസിസ്റ്റഡ് റീപ്രൊഡക്റ്റീവ് ടെക്നോളജി (റെഗുലേഷൻ) ആക്ടിലെ സെക്ഷൻ 21 (ജി) പ്രകാരം കൃത്രിമ ഗർഭം ധരിക്കുന്ന ദമ്പതികളിൽ സ്ത്രീകളുടെ ഉയർന്ന പ്രായപരിധി 50, പുരുഷന്മാർക്ക് 55 എന്നിങ്ങനെയാണ്. ഇത് ചോദ്യം ചെയ്ത് സമർപ്പിച്ച ഒരു കൂട്ടം ഹർജിയിലാണ് ഹൈക്കോടതിയുടെ നിര്‍ണായക ഇടപെടല്‍. മൂന്നു മാസത്തിനകം ഇത് സംബന്ധിച്ച് തീരുമാനമെടുക്കാനാണ് ജസ്റ്റിസ് വി ജി അരുണിന്റെ ഉത്തരവ്.
ദമ്പതികളിൽ ആർക്കെങ്കിലും ഒരാൾക്ക് നിയമത്തിൽ പറയുന്ന പ്രായ പരിധി പൂർത്തിയായാൽ ഇവർക്ക് കൃത്രിമ ഗർഭധാരണം നിഷേധിക്കപ്പെടുന്ന സാഹചര്യമാണുള്ളത്. ഇത് ഭരണഘടന ഉറപ്പ് നൽകുന്ന വ്യക്തി സ്വാതന്ത്ര്യത്തിന് എതിരാണെന്ന് ചൂണ്ടിക്കാട്ടിയുള്ള 28 ഹർജികളാണ് ഹൈക്കോടതി പരിഗണിച്ചത്. ഹർജിക്കാരിൽ മിക്കവരും നിയമം നിഷ്കർഷിക്കുന്ന പ്രായപരിധി തികയുന്നതിനു മുൻപ് തന്നെ ക്യത്രിമ ഗർഭധാരണത്തിനായി ചികിത്സ തുടരുന്നവരാണ്. അനുമതി നിഷേധിക്കുന്നത് യുക്തി രഹിതവും അവകാശ ലംഘനവുമാണെന്ന് കോടതി കണ്ടെത്തി. ഹർജിക്കാരിൽ ചികിത്സയിലിരിക്കുന്നവർക്ക് ചികിത്സ തുടർന്ന് പൂർത്തിയാക്കുവാനും ജസ്റ്റിസ് വി ജി അരുൺ അനുമതി നൽകി.
നിശ്ചിത പ്രായപരിധി കഴിഞ്ഞവര്‍ക്ക് ആശുപത്രികളിൽ നിന്ന് ചികിത്സ നല്‍കുന്നില്ലെന്നാണ് പരാതി. അതിനാല്‍ ആശുപത്രിയിലെ സേവനം ലഭ്യമാക്കുന്നതിന് അടിയന്തര നടപടികൾ സ്വീകരിക്കാൻ നിര്‍ദേശം നല്‍കണമെന്നായിരുന്നു ഹര്‍ജിക്കാരുടെ ആവശ്യം. അന്‍പതുകളിലേക്ക് കടന്ന ദമ്പതികളാണ് ഹര്‍ജി നല്‍കിയവരില്‍ ഏറെയും.
നിയമപ്രകാരം എആർടി സേവനങ്ങൾ നൽകുന്നതിന് ഗർഭനിരോധന മാർഗങ്ങൾ ഉപയോഗിക്കാതെ ഒരു വർഷം ഒരുമിച്ച് കഴിയണം. ഒരു വർഷം തികയുമ്പോൾ, അപേക്ഷകർ ആശുപത്രിയെ സമീപിക്കുകയും ഇൻ-വിട്രോ ഫെർട്ടിലൈസേഷൻ (ഐവിഎഫ്) സാങ്കേതികത വിദ്യ പരിഗണിക്കുകയും ചെയ്യണമെന്നാണ്. എന്നാല്‍ ഹര്‍ജിക്കാരില്‍ ചിലര്‍ വന്ധ്യതാ ചികിത്സയ്ക്കായിഎത്തിയപ്പോള്‍ എആർടി നിയമം 2022 ജനുവരി 25 മുതൽ പ്രാബല്യത്തിൽ വന്നെന്നും പ്രായ പരിധി പിന്നിട്ടതിനാല്‍ ചികിത്സ നല്കാ‍നാവില്ലെന്നും ആശുപത്രി അധിക്യതര്‍ വ്യക്തമാക്കിയെന്നാണ് ചൂണ്ടിക്കാട്ടുന്നത്. എആര്‍ടി നിയമത്തിലെ നിശ്ചിത വകുപ്പ് വിവേചനപരവും പ്രത്യുത്പാദന സ്വാതന്ത്ര്യത്തിൽ കടന്നുകയറ്റം നടത്തുന്നതുമാണെന്ന ഹര്‍ജിക്കാരുടെ വാദം അംഗീകരിച്ചായിരുന്നു കോടതി ഇടപെടല്‍.
