സ്വത്ത് ജപ്തി ചെയ്തു; സിംഗിള്‍ ബെഞ്ച് ഉത്തരവിനെതിരേ സമര്‍പ്പിച്ച സാന്റിയാഗോ മാര്‍ട്ടിന്റെ അപ്പീല്‍ ഡിവിഷന്‍ ബെഞ്ച് തള്ളി
ലോട്ടറിയിടപാടുമായി ബന്ധപ്പെട്ട കേസില്‍ എന്‍ഫോഴ്‌സ് ഡയറക്ടറേറ്റ് സ്വത്ത് ജപ്തി ചെയ്തത് ചോദ്യം ചെയ്യുന്ന ഹര്‍ജി സിംഗിള്‍ബെഞ്ച് തള്ളിയതിനെതിരെ സാന്റിയാഗോ മാര്‍ട്ടിന്‍ സമര്‍പിച്ച അപ്പീല്‍ ഹര്‍ജിയും ഡിവിഷന്‍ ബഞ്ച് തള്ളി.
893 കോടി രൂപയുടെ സ്വത്ത് താല്‍ക്കാലികമായി ജപ്തി ചെയ്ത നടപടിക്കെതിരെ സമര്‍പിച്ച അപ്പീല്‍ ചീഫ് ജസ്റ്റിസ് ആശിഷ് ജെ ദേശായി, ജസ്റ്റിസ് വി ജി അരുണ്‍ എന്നിവരടങ്ങുന്ന ഡിവിഷന്‍ ബെഞ്ചാണ് തള്ളിയത്.
സംസ്ഥാനത്തെ ലോട്ടറി നിയമങ്ങളും ചട്ടങ്ങളും ലംഘിച്ച് ലോട്ടറിക്കച്ചവടം നടത്തിയ കേസില്‍ സാന്റിയാഗോ മാര്‍ട്ടിന്‍ പങ്കാളിയായ എം ജെ അസോസിയേറ്റ്സിനെതിരെ സിബിഐ കുറ്റപത്രം നല്‍കിയതിന് പിന്നാലെയാണ് കള്ളപ്പണം വെളുപ്പിക്കുന്നത് തടയല്‍ നിയമപ്രകാരം ഇഡി കേസ് രജിസ്റ്റര്‍ ചെയ്ത് സ്വത്തുക്കള്‍ ജപ്തി ചെയ്തത്.
തനിക്ക് എം ജെ അസോസിയേറ്റ്സില്‍ 51 ശതമാനം ഓഹരിയും മറ്റൊരു പങ്കാളിയായ ജയമോഹന് 49 ശതമാനം ഓഹരിയുമാണുള്ളതെന്നും പാര്‍ട്ണര്‍ഷിപ്പ് കമ്പനിയുടെ പേരിലുള്ള കേസില്‍ തന്റെ സ്വത്തില്‍ നിന്ന് 464.35 കോടി രൂപയുടെ സ്വത്തുക്കള്‍ മാത്രമേ ജപ്തി ചെയ്യാനാവൂയെന്നായിരുന്നു സാന്റിയാഗോ മാര്‍ട്ടിന്റെ വാദം. ജപ്തി നടപടികള്‍ക്കെതിരെ സ്വതന്ത്ര അതോറിറ്റിയെയും അപ്പെലറ്റ് ട്രൈബ്യൂണലിനെയും സമീപിക്കാമെന്നിരിക്കെ നേരിട്ട് ഹൈകോടതിയെ സമീപിച്ചത് നിയമപരമല്ലെന്നായിരുന്നു ഇഡിയുടെ വാദം.
