ആക്രമണ സാധ്യത; രാജ്ഭവന് സുരക്ഷ ശക്തമാക്കി
ഗവര്‍ണറും സര്‍ക്കാരും തമ്മിലുള്ള പോര് മുറുകുന്നതിനിടെ രാജ്ഭവന് പോലീസ് സുരക്ഷ ശക്തമാക്കി. വിവാദങ്ങളുടെ പശ്ചാത്തലത്തില്‍ ആക്രമണ സാധ്യത മുന്നില്‍ കണ്ടാണ് നടപടി. ആക്രമണ സാധ്യതയുണ്ടെന്ന രഹസ്യാന്വേഷണ റിപ്പോർട്ടിന്റെ അടിസ്ഥാനത്തില്‍ രാജ്ഭവൻ പരിസരത്ത് നിരീക്ഷണം ശക്തമാക്കി. രാത്രി പട്രോളിങും കർശനമാക്കും.
വി സിമാരെ പിന്‍വലിക്കാനുള്ള നീക്കത്തിന് പിന്നാലെ ധനമന്ത്രി കെ എന്‍ ബാലഗോപാലിനെ മന്ത്രിസ്ഥാനത്ത് നീക്കണമെന്ന ആവശ്യമുന്നയിച്ച് അസാധാരണ നീക്കവുമായി ഗവര്‍ണര്‍ രംഗത്ത് വന്നിരുന്നു. കെ എന്‍ ബാലഗോപാലിനോടുള്ള 'പ്രീതി' നഷ്ടപ്പെട്ടെന്നും മന്ത്രിസഭയില്‍ നിന്ന് നീക്കണമെന്നുമാണ് ഗവര്‍ണര്‍ രേഖാമൂലം മുഖ്യമന്ത്രിയോട് ആവശ്യപ്പെട്ടത്. ആവശ്യം മുഖ്യമന്ത്രി പാടെ തള്ളിയിരുന്നു. ഇടതുമുന്നണി നേതാക്കള്‍ ഗവര്‍ണറുടെ ഇടപെടലിനെതിരെ രൂക്ഷവിമര്‍ശനമാണ് ഉന്നയിച്ചത്.
സര്‍ക്കാരുമായുള്ള ഗവര്‍ണറുടെ പോര് മുറുകിയതോടെ ഗവര്‍ണര്‍ക്കെതിരെ പരസ്യപ്രതിഷേധവുമായി രംഗത്തിറങ്ങാന്‍ എല്‍ഡിഎഫ് തീരുമാനമെടുത്തിരുന്നു. ഇതിന്‌റെ ഭാഗമായി നവംബര്‍ 15ന് രാജ്ഭവന് മുന്നില്‍ പ്രതിഷേധ ധര്‍ണ നടത്തുമെന്ന് എല്‍ഡിഎഫ് നേരത്തെ പ്രഖ്യാപിച്ചതാണ്.
