നടിയെ ആക്രമിച്ച കേസ്: അതിജീവിതയുടെ ഹർജി ജ.സിയാദ് റഹ്മാന്‍ പരിഗണിക്കും
നടിയെ ആക്രമിച്ച കേസിന്റെ വിചാരണ സെഷന്‍സ് കോടതിയിലേക്ക് മാറ്റിയതിനെതിരെ അതിജീവിത നല്‍കിയ ഹർജി ജ.സിയാദ് റഹ്മാന്‍ പരിഗണിക്കും. ജസ്റ്റിസ് കൗസ‍ർ എടപ്പഗത്ത് ഹർജി പരിഗണിക്കുന്നതില്‍ നിന്ന് പിന്മാറിയതിനെത്തുടർന്നാണ് കേസ് പുതിയ ബെഞ്ച് പരിഗണിക്കുന്നത്. കഴിഞ്ഞ വെള്ളിയാഴ്ചയാണ് ജസ്റ്റിസ് കൗസ‍ർഎടപ്പഗത്ത് ഹർജി പരിഗണിക്കുന്നതില്‍ നിന്ന് പിന്മാറിയത്.
കേസിന്റെ വിചാരണ എറണാകുളത്തെ പ്രത്യേക സിബിഐ കോടതിയില്‍ നിന്ന് പ്രിന്‍സിപ്പല്‍ സെഷന്‍സ് കോടതിയിലേക്ക് മാറ്റിയതിനെതിരെ ഹൈക്കോടതിയില്‍ നല്‍കിയ ഹർജിയാണ് ജ.സിയാദ് റഹ്മാന്‍ പരിഗണിക്കുക. നടിയെ ആക്രമിച്ച കേസ് എറണാകുളം പ്രിന്‍സിപ്പല്‍ സെഷന്‍സ് കോടതി കേസ് പരിഗണിക്കരുതെന്ന ആവശ്യവുമായി അതിജീവിതയും പ്രോസിക്യൂഷനും വിചാരണ കോടതിയെ സമീപിച്ചിരുന്നു.
സിബിഐ കോടതിക്കാണ് കേസ് നടത്തിപ്പിന്റെ ചുമതല ഹൈക്കോടതി കൈമാറിയത്. ജോലിഭാരം കാരണം പ്രിന്‍സിപ്പല്‍ സെഷന്‍സ് കോടതിക്ക് കേസ് കൈമാറാനാകില്ലെന്ന് ഹൈക്കോടതി അറിയിച്ചിരുന്നു.നിലവില്‍ കേസിലെ വിചാരണ നടത്തുന്ന സിബിഐ കോടതി പ്രത്യേക ജഡ്ജി ഹണി എം വര്‍ഗീസിന് സ്ഥാനക്കയറ്റം ലഭിച്ചതോടെയാണ് കേസ് രേഖകള്‍ പ്രിന്‍സിപ്പല്‍ സെഷന്‍സ് കോടതിയിലേക്ക് എത്തിയത്. ഇതിന് പിന്നാലെ കേസ് നടത്തിപ്പും എറണാകുളം സിബിഐ കോടതി മൂന്നില്‍ നിന്ന് പ്രിന്‍സിപ്പല്‍ സെഷന്‍സ് കോടതിയിലേക്ക് മാറ്റുകയായിരുന്നു.
