ശസ്ത്രക്രിയക്കിടെ വയറ്റില്‍ കത്രിക കുടുങ്ങിയ സംഭവം: കുറ്റക്കാർക്കെതിരെ നിയമ നടപടിക്ക് തടസമില്ലെന്ന് നിയമോപദേശം
ശസ്ത്രക്രിയക്കിടെ ഹർഷിനയുടെ വയറ്റിൽ കത്രിക കുടുങ്ങിയ സംഭവത്തിൽ കുറ്റക്കാരെന്ന് പോലീസ് കണ്ടെത്തിയവർക്കെതിരെ നിയമ നടപടിയുമായി മുന്നോട്ട് പോകാമെന്ന് നിയമോപദേശം. 338, 386 വകുപ്പുകളനുസരിച്ച് കുറ്റം ചുമത്തുന്നതിനും, അറസ്റ്റുമായി മുന്നോട്ട് പോകുന്നതുൾപ്പെടെയുള്ള കാര്യങ്ങൾക്കും തടസ്സമില്ലെന്നാണ് അന്വേഷണ സംഘത്തിന് നിയമോപദേശം ലഭിച്ചത്. ജില്ലാ ഗവൺമെന്റ് പ്ലീഡർ ആന്റ് പബ്ലിക്ക് പ്രോസിക്യൂട്ടർ കെ ജയകുമാറാണ് അന്വേഷണ ഉദ്യോഗസ്ഥനായ മെഡിക്കൽ കോളേജ് അസിസ്റ്റന്റ് കമ്മീഷണർ കെ സുദർശന് നിയമോപദേശം നൽകിയത്.
338, 386 വകുപ്പുകളനുസരിച്ച് കുറ്റം ചുമത്തുന്നതിനും, അറസ്റ്റുമായി മുന്നോട്ട് പോകുന്നതുൾപ്പെടെയുള്ള കാര്യങ്ങൾക്കും തടസ്സമില്ലെന്നാണ് അന്വേഷണ സംഘത്തിന് നിയമോപദേശം ലഭിച്ചത്
ജില്ലാ മെഡിക്കൽ ബോർഡ് അന്വേഷണ റിപ്പോർട്ട് തള്ളിയതിന് ശേഷവും പോലീസ് കേസുമായി മുന്നോട്ട് പോവുകയായിരുന്നു. മെഡിക്കൽകോളേജിലെ ഒരു സീനിയർ ഡോക്ടർ, പി ജി ഡോക്ടർ, രണ്ട് നഴ്സുമാർ എന്നിവരാണ് പ്രതിസ്ഥാനത്തുള്ളത്. ആരോഗ്യ വകുപ്പിന്റെ മറ്റന്വേഷണങ്ങൾക്ക് കാത്ത് നിൽക്കേണ്ടതില്ലെന്നും നിയമോപദേശത്തില്‍ പറയുന്നു. കുറ്റപ്പത്രം സമർപ്പിക്കുന്നതിന് മുന്നോടിയായാണ് പോലീസ് നിയമോപദേശം തേടിയത്.
നീതി തേടി ഹർഷിന പ്രതിഷേധം തുടരുകയാണ്. തിരുവോണ ദിനത്തില്‍ നിരാഹാര സമരം നടത്തും. ഏതെങ്കിലും ഡോക്ടറോടോ നഴ്സിനോടോ വ്യക്തിപരമായ വിദ്വേഷമില്ലെന്നും ഇത്രയും വലിയ പിഴവ് സംഭവിച്ചിട്ടും നടപടിയെടുക്കാന്‍ തയ്യാറാകാതിരുന്ന മെഡിക്കല്‍ ബോർഡിന്റെ നിലപാടിൽ വിയോജിപ്പുണ്ടെന്നും ഹർഷിന പറഞ്ഞു. പോലീസിന്റെ അന്വേഷണത്തില്‍ തൃപ്തരാണെന്നും നീതി ലഭിക്കുമെന്നാണ് പ്രതീക്ഷയെന്നും അവർ വ്യക്തമാക്കി.
