'സ്‌നേഹ സൗഹൃദത്തിന്റെ കൊടിയിറക്കം'; കോടിയേരിയുടെ അപൂര്‍വ ഫോട്ടോ പങ്കുവച്ച് മാഹി എംഎല്‍എ
സിപിഎം മുന്‍ സംസ്ഥാന സെക്രട്ടറി കോടിയേരി ബാലകൃഷ്ണനുമായുള്ള സൗഹൃദത്തിന്റെ ഓര്‍മ്മകള്‍ പങ്കിട്ട് മാഹി എംഎല്‍എ രമേശ് പറമ്പത്ത്. ഫേസ്ബുക്കില്‍ പങ്കുവച്ച ഫോട്ടോകള്‍ക്കൊപ്പമാണ് മാഹി എംഎല്‍എ കോളേജ് പഠനകാലത്തെ അനുസ്മരിക്കുന്നത്.
പതിനഞ്ചാമത് പുതുച്ചേരി നിയമസഭയിലെ മാഹിയില്‍ നിന്നുള്ള പ്രതിനിധിയാണ് രമേശ് പറമ്പത്ത്.
സ്‌നേഹ സൗഹൃദത്തിന്റെ കൊടിയിറക്കം. മാഹി, മഹാത്മാഗാന്ധി ഗവണ്മെന്റ് കോളേജിലെ ആദ്യത്തെ യൂണിയന്‍ കൗണ്‍സില്‍ ചെയര്‍മാന്‍ ശ്രീ. കോടിയേരി ബാലകൃഷ്ണന് ആദരാഞ്ജലികള്‍! എന്ന രണ്ടുവരി അനുസ്മരണത്തോടൊപ്പമാണ് കോടിയേരിയുടെ അപൂര്‍വ ചിത്രം എംഎല്‍എ പങ്കുവയ്ക്കുന്നത്. 1970-71 കാലത്തെ ചിത്രത്തില്‍ കറുത്ത കോട്ടണിഞ്ഞാണ് കോടിയേരിയുള്ളത്.
പതിനഞ്ചാമത് പുതുച്ചേരി നിയമസഭയിലെ മാഹിയില്‍ നിന്നുള്ള പ്രതിനിധിയാണ് രമേശ് പറമ്പത്ത്. ഇന്ത്യന്‍ നാഷണല്‍ കോണ്‍ഗ്രസിനെ പ്രതിനിധീകരിച്ച് നിയമ സഭയിലെത്തിയ രമേശ് പറമ്പത്ത് കെ.എസ്.യു അംഗമായിട്ടാണ് രമേശ് രാഷ്ട്രീയ ജീവിതം ആരംഭിച്ചത്. 1984- 85, 1985-86 കാലഘട്ടത്തില്‍ തുടര്‍ച്ചയായി രണ്ട് തവണ മാഹി മഹാത്മാഗാന്ധി ഗവണ്മെന്റ് ആര്‍ട്‌സ് കോളേജ് യൂണിയന്‍ ചെയര്‍മാനായി തിരഞ്ഞെടുക്കപ്പെട്ടിട്ടുണ്ട്.
വിദ്യാര്‍ഥി പ്രസ്ഥാനത്തിലൂടെയാണ് കോടിയേരി ബാലകൃഷ്ണനും പൊതു പ്രവര്‍ത്തന രംഗത്തേക്ക് എത്തുന്നത്. ഹൈസ്‌കൂള്‍ വിദ്യാഭ്യാസത്തിനുശേഷം മാഹി മഹാത്മാഗാന്ധി കോളേജില്‍ പ്രീഡിഗ്രിക്ക് ചേര്‍ന്ന കോടിയേരി ഇവിടെ കോളേജ് യൂണിയന്‍ ചെയര്‍മാനായിരുന്നു. തുടര്‍ന്ന് തിരുവനന്തപുരം യൂണിവേഴ്സിറ്റി കോളേജില്‍ ബിരുദവിദ്യാര്‍ഥിയായി. യൂണിവേഴ്സിറ്റി കോളേജ് വിദ്യാര്‍ഥിയായിരിക്കെ 1973ല്‍ എസ്എഫ്ഐ സംസ്ഥാന സെക്രട്ടറിയായി. 1979 വരെ ആ സ്ഥാനത്ത് തുടര്‍ന്നു.
