ഭാഗ്യശാലികൾക്ക് ഒരു പരിശീലന കളരി
ഭാഗ്യക്കുറിയിലൂടെ തേടിയെത്തിയ ഭാഗ്യം കൈവിട്ടുപോകാതിരിക്കാൻ എന്തുചെയ്യാൻ കഴിയും? അതിനുത്തരം നല്‍കുകയാണ് കേരള സംസ്ഥാന ഭാഗ്യക്കുറി വിജയികള്‍ക്കായി സര്‍ക്കാരിന്റെ പരിശീലന പരിപാടി. കേരള സംസ്ഥാന ഭാഗ്യക്കുറി വിജയികള്‍ക്ക് ഇന്ന് സര്‍ക്കാര്‍ സംഘടിപ്പിച്ച പരിശീലന പരിപാടി മാസ്‌ക്കറ്റ് ഹോട്ടലിൽ വെച്ച് നടന്നു. ഗുലാത്തി ഇന്‍സ്റ്റിറ്റ്യൂട്ട് ഓഫ് ഫിനാന്‍സ് ആന്‍ഡ് ടാക്സേഷന്റെ നേതൃത്വത്തിലാണ് പരിശീലനം നടത്തിയത്. പരിശീലന പരിപാടി ധനമന്ത്രി കെ എന്‍ ബാലഗോപാല്‍ ഉദ്ഘാടനം ചെയ്തു.
വ്യക്തിയുടെയും കുടുംബത്തിന്റെയും ഭദ്രതയ്ക്കുതകുന്ന സാമ്പത്തിക മാനേജ്മെന്റ്, സ്ഥിര നിക്ഷേപങ്ങള്‍, ലൈഫ് ഇന്‍ഷുറന്‍സ്, ചിട്ടിയും കുറിയും, ഇക്വിറ്റി, ഡിബഞ്ചര്‍, മ്യൂച്വല്‍ ഫണ്ട് എന്നിവയില്‍ പണം നിക്ഷേപിക്കുന്നതിനെ കുറിച്ചും പണം ഒന്നിച്ച് കൈയിലെത്തുമ്പോഴുള്ള ടെന്‍ഷന്‍ കുറയ്ക്കാനുള്ള കൗണ്‍സലിങ് രീതികളും, പണം ചെലവാക്കുന്നതിലും നിക്ഷേപിക്കുന്നതിലുമുള്ള ആശങ്ക പരിഹരിക്കാന്‍ ആശയവിനിമയ പരിപാടിയും പരിശീലനത്തിന്റെ ഭാഗമായി നടന്നു.
സംസ്ഥാന ഭാഗ്യക്കുറി ഡയറക്ടര്‍ എബ്രഹാം, ഗുലാത്തി ഇന്‍സ്റ്റിറ്റ്യൂട്ട് ഡയറക്ടര്‍ പ്രൊഫ. കെ ജെ. ജോസഫ്, കൗണ്‍സിലര്‍ കെഎസ് ബീന, ലോട്ടറിവകുപ്പ് ജോയന്റ് ഡയറക്ടര്‍ മനോജ് കുമാർ തുടങ്ങിയവരും പരിപാടിയില്‍ പങ്കെടുത്തു.
