മത പഠനശാലയിൽ പെൺകുട്ടി ആത്മഹത്യ ചെയ്ത സംഭവം: ഒരാള്‍ അറസ്റ്റില്‍; പോക്സോ കേസില്‍ പിടിയിലായത് സുഹൃത്ത്
ബാലരാമപുരത്തെ മത പഠനശാലയിൽ പെൺകുട്ടി ആത്മഹത്യ ചെയ്ത സംഭവത്തിൽ ഒരാളെ അറസ്റ്റ് ചെയ്തു. ബീമാപ്പള്ളി സ്വദേശി ഹാഷിം ഖാനെ പൂന്തുറ പോലീസാണ് പിടികൂടിയത്. പെൺകുട്ടി പീഡനത്തിന് ഇരയായതായി കണ്ടെത്തിയതിനെ തുടർന്ന് ഹാഷിംഖാനെതിരെ പോക്സോ കേസ് രജിസ്റ്റർ ചെയ്തിരുന്നു. പെൺകുട്ടിയുടെ സുഹൃത്താണ് പ്രതിയെന്ന് പോലീസ് അറിയിച്ചു.
മതപഠനശാലയിൽ ദുരൂഹസാഹചര്യത്തിൽ മരിച്ച പെൺകുട്ടി പീഡനത്തിന് ഇരയായതായുള്ള പോസ്റ്റ്മോർട്ടം റിപ്പോർട്ട് കഴിഞ്ഞ ദിവസമാണ് അന്വേഷണ സംഘത്തിന് ലഭിച്ചത്. ആത്മഹത്യ ചെയ്യുന്നതിന് ആറ് മാസം മുൻപ് പീഡിപ്പിക്കപ്പെട്ടുവെന്നാണ് റിപ്പോർട്ട്. ഇതിന്റെ അടിസ്ഥാനത്തിൽ നടത്തിയ അന്വേഷണത്തിലാണ് ആൺ സുഹൃത്തിനെതിരെ പോലീസ് പോക്സോ കേസ് രജിസ്റ്റർ ചെയ്തത്.
മതപഠനശാലയിൽ തൂങ്ങി മരിച്ച നിലയിൽ ഈ മാസം 13നാണ് പെണ്‍കുട്ടിയെ കണ്ടെത്തുന്നത്. മതപഠനശാലയിലെ പീഡനമാണ് മരണകാരണമെന്ന ബന്ധുക്കളുടെ ആരോപണത്തെ തുടർന്ന് ആത്മഹത്യ പ്രേരണക്കേസ് അന്വേഷിക്കുമ്പോഴാണ് വഴിത്തിരിവായ പോസ്റ്റുമോ‍ർട്ടം റിപ്പോർട്ട് പോലീസ് ലഭിക്കുന്നത്.
തുടർന്ന്, ബാലരാമപുരം പോലീസ് പോക്സോ കേസ് രജിസ്റ്റർ ചെയ്തു, പെൺകുട്ടിയുടെ വീടിന്റെ പരിധിയിലെ പൂന്തുറ പോലീസിന് കേസ് കൈമാറി. ആണ്‍സുഹൃത്തുമായുള്ള ബന്ധം വീട്ടുകാർ കണ്ടെത്തുകയും കുട്ടിയെ മതപഠനശാലയിലേക്ക് മാറ്റുകയും ചെയ്തുവെന്നാണ് അന്വേഷണ സംഘത്തിന്റെ നിഗമനം. പെണ്‍കുട്ടി മതപഠനശാലയിൽ എത്തുന്നതിന് മുൻപ് പീഡനത്തിന് ഇരയായി എന്ന നിഗമനത്തിലാണ് അന്വേഷണ സംഘം.
