ഭിന്നശേഷിക്കാരോട് വിവേചനം; യൂണി. അസിസ്റ്റന്റ് പ്രിലിമിനറി റാങ്ക് ലിസ്റ്റിൽ ഉൾപ്പെടുത്തിയത് അവസാനനിമിഷം, പഠിക്കാൻ 6 ദിവസം
യൂണിവേഴ്‌സിറ്റി അസിസ്റ്റന്റ് തസ്തികയിലേക്കുള്ള പ്രിലിമിനറി റാങ്ക് ലിസ്റ്റില്‍ ഭിന്നശേഷിക്കാരായ ഉദ്യോഗാര്‍ഥികളെ പി എസ് സി ഉള്‍പ്പെടുത്തിയത് അവസാന നിമിഷം. ഇതോടെ ഇവർക്ക് മെയിൻ മെയിന്‍ പരീക്ഷയ്ക്ക് പഠിക്കാൻ ലഭിക്കുന്നത് ആറ് ദിവസം. ഓഗസ്റ്റ് 25 നാണ് മെയിന്‍ പരീക്ഷ. ഇതിനായി ജൂലൈ 21ന് പ്രസിദ്ധീകരിച്ച പ്രിലിമിനറി റാങ്ക് ലിസ്റ്റില്‍ ഭിന്നശേഷിക്കാരെ ഉൾപ്പെടുത്തിയിരുന്നില്ല. ഉദ്യോഗാര്‍ഥികള്‍ പി എസ് സിയെ ബന്ധപ്പെട്ടപ്പോള്‍, മെയിന്‍ പരീക്ഷയ്ക്ക് ആവശ്യമുള്ളവരെ ലഭിച്ചിട്ടുണ്ടെന്നും ഉള്‍പ്പെടുത്താന്‍ കഴിയില്ലെന്നുമുള്ള മറുപടിയാണ് ലഭിച്ചത്. എന്നാല്‍, ഓഗസ്റ്റ് 18ന് മുന്നൂറിലേറെ ഭിന്നശേഷിക്കാരെ ഉള്‍പ്പെടുത്തി പുതിയ ലിസ്റ്റ് പ്രസിദ്ധീകരിക്കുകയായിരുന്നു.
ഓഗസ്റ്റ് 25 നാണ് മെയിന്‍ പരീക്ഷ
ഏപ്രില്‍, മേയ് മാസങ്ങളില്‍ മൂന്ന് ഘട്ടമായാണ് പ്രിലിമിനറി പരീക്ഷ നടത്തിയത്. ജൂലൈ 21ന് പ്രസിദ്ധീകരിച്ച ലിസ്റ്റില്‍ ഉള്‍പ്പെട്ടവര്‍ക്ക് ഒരു മാസത്തിലധികം സമയം പഠനത്തിനായി ലഭിക്കുമെന്നിരിക്കെ സംവരണവിഭാഗമായ ഭിന്നശേഷിക്കാര്‍ക്ക് പഠനത്തിനായി ലഭിക്കുക ആറ് ദിവസം മാത്രം.
സ്‌പെഷ്യല്‍ പാഠഭാഗങ്ങള്‍ അടക്കം പഠിക്കാന്‍ ഒരു മാസമെങ്കിലും വേണമെന്നും പി എസ് സിയുടേത് വിവേചനപരമായ നടപടിയാണെന്നും ഉദ്യോഗാര്‍ഥിയായ മലപ്പുറം എടക്കര സ്വദേശി സല്‍മാനുല്‍ ഫാരിസ് 'ദ ഫോര്‍ത്തി' നോട് പറഞ്ഞു.
പരീക്ഷത്തീയതി മാറ്റാന്‍ തീരുമാനിച്ചിട്ടില്ലെന്ന് അധികൃതര്‍. ആദ്യം പ്രസിദ്ധീകരിച്ച ലിസ്റ്റില്‍ കേള്‍വി, സംസാരം, കാഴ്ച ശേഷികളില്ലാത്തവരെ പരിഗണിച്ചിട്ടുണ്ടെന്നും മറ്റു വൈകല്യങ്ങലുള്ളവരെയാണ് ഓഗസ്റ്റ് 18ന് പ്രസിദ്ധീകരിച്ച ലിസ്റ്റില്‍ ഉള്‍പ്പെടുത്തിയതെന്നും പി എസ് സി അധികൃതര്‍ 'ദ ഫോര്‍ത്തി' നോട് പറഞ്ഞു. എന്നാല്‍ പരീക്ഷയ്ക്ക് തയാറെടുക്കാനുള്ള സമയം എല്ലാവര്‍ക്കും ഒരുപോലെ നല്‍കേണ്ടതല്ലേ എന്ന ചോദ്യത്തിന് മറുപടിയില്ല.
ഭിന്നശേഷിക്കാര്‍ക്ക് നാല് ശതമാനം സംവരണമുണ്ടായിട്ടും റാങ്ക് ലിസ്റ്റ് പ്രസിദ്ധീകരിക്കുന്നതിലടക്കം വന്‍ വീഴ്ചയാണ് പി എസ് സിക്ക് സംഭവിച്ചിരിക്കുന്നത്. പരീക്ഷ തീയതി മാറ്റുന്നതിനെക്കുറിച്ച് ആലോചിച്ചിട്ടില്ലെന്നും പരാതിയുണ്ടെങ്കില്‍ എഴുതി അറിയിക്കണമെന്നും പി എസ് സി വ്യക്തമാക്കുന്നു. പരീക്ഷാതീയതി മാറ്റണമെന്ന് അറിയിച്ച് പി എസ് സി ചെയര്‍മാന് ഭിന്നശേഷിക്കാരായ ഉദ്യോഗാര്‍ഥികള്‍ കത്തയച്ചിട്ടുണ്ട്.
