സർക്കാർ നിർദേശം തള്ളി ഗവർണർ; മലയാളം സര്‍വകലാശാലയില്‍ സാബു തോമസ് താല്‍ക്കാലിക വി സി
മലയാളം സർവകലാശാല താത്കാലിക വി സി നിയമനത്തിനുള്ള സർക്കാർ നിർദേശം ഗവർണർ തള്ളി. വി സിയുടെ ചുമതല എം ജി സർവകലാശാല വൈസ് ചാൻസലർ സാബു തോമസിന് നല്‍കി ഗവര്‍ണര്‍ ഉത്തരവിറക്കി. മലയാളം സർവകലാശാല വി സി ആയിരുന്ന ഡോ. അനിൽ വള്ളത്തോൾ കാലാവധി പൂർത്തിയാക്കിയ ഒഴിവിലാണ് അധിക ചുമതലയായി സാബു തോമസിന് സ്ഥാനം നല്‍കിയത്. വി സി നിയമനത്തിനുള്ള നടപടിക്രമങ്ങള്‍ സര്‍ക്കാര്‍ സ്വമേധയാ നടത്തിവന്നിരുന്നെങ്കിലും ഗവര്‍ണര്‍ പുതിയ വി സി നിയമന നടപടികളുമായി മുന്നോട്ടു പോകുകയായിരുന്നു.
സര്‍ക്കാര്‍ മൂന്ന് പേരുകള്‍ നിര്‍ദേശിച്ചുകൊണ്ടുള്ള കത്ത് ഗവര്‍ണര്‍ക്ക് നല്‍കിയെങ്കിലും ഗവര്‍ണര്‍ അത് അംഗീകരിച്ചില്ല. പുതിയ വിസിയെ നിയമിക്കും വരെ സാബു തോമസ് വൈസ് ചാന്‍സലറായിരിക്കുമെന്ന് കാണിച്ചുകൊണ്ടാണ് രാജ്ഭവന്‍ ഉത്തരവിറക്കിയിരിക്കുന്നത്. യുജിസി നിയമം, സര്‍വകലാശാല നിയമം എന്നിവയുടെഅടിസ്ഥാനത്തില്‍ ചാന്‍സലര്‍ എന്ന അധികാരം ഉപയോഗിച്ചാണ് ഗവര്‍ണര്‍ നടപടി സ്വീകരിച്ചിരിക്കുന്നത്.
പോളിമര്‍ സയന്‍സിലും നാനോ മെഡിസിനിലും നടത്തിയ ഗവേഷണങ്ങളുടെ പേരില്‍ ശ്രദ്ധേയനാണ് മഹാത്മാ ഗാന്ധി യൂണിവേഴ്സിറ്റി വൈസ് ചാന്‍സലര്‍ ഡോ. സാബു തോമസ്. മുപ്പതോളം ദേശീയ അന്തര്‍ദേശീയ പുരസ്‌കാരങ്ങള്‍ ഇദ്ദേഹത്തിന് ലഭിച്ചിട്ടുണ്ട്.
