വയനാട് ചീരാലില്‍ ജനത്തെ ഭീതിയിലാക്കിയ കടുവ പിടിയില്‍
വയനാട് ചീരാലില്‍ ഒരു മാസമായി ഭീതി പടര്‍ത്തിയിരുന്ന കടുവയെ പിടികൂടി. ഇന്ന് പുലര്‍ച്ചെ അഞ്ച് മണിയോടെയാണ് കടുവ കൂട്ടിലായത്. 10 വയസ് പ്രായമുള്ള ആണ്‍ കടുവയാണ് പിടിയിലായത്. കടുവയെ ബത്തേരിയിലെ വന്യ മൃഗ പരിപാലന കേന്ദ്രത്തിലേയ്ക്ക് മാറ്റി. ഒരു മാസത്തിനിടെ 13 വളര്‍ത്തുമൃഗങ്ങളെ കടുവ ആക്രമിച്ചിരുന്നു. പത്ത് പശുക്കള്‍ കടുവയുടെ ആക്രമണത്തില്‍ ചത്തു.
പാഴൂരില്‍ വനംവകുപ്പ് സ്ഥാപിച്ച കൂട്ടില്‍ ഇന്ന് പുലര്‍ച്ചയോടെയാണ് കടുവ കുടുങ്ങിയത്. കഴിഞ്ഞ ദിവസം ഇതേ സ്ഥലത്ത് വെച്ചായിരുന്ന കടുവ പശുവിനെ ആക്രമിച്ചത്. നേരത്തെ പല സ്ഥലങ്ങളില്‍ കൂട് സ്ഥാപിച്ചിട്ടും കടുവയെ പിടികൂടാന്‍ സാധിച്ചിരുന്നില്ല. മുപ്പതോളം ലൈവ് ക്യാമറകളും കടുവയെ കണ്ടെത്താനായി സ്ഥാപിച്ചിരുന്നു. പൂമറ്റം വനമേഖലയില്‍ സ്ഥാപിച്ച ലൈവ് സ്ട്രീമിങ് ക്യാമറയില്‍ കടുവയുടെ ചിത്രം പതിഞ്ഞിരുന്നു.
വളര്‍ത്തു മൃഗങ്ങളെ ആക്രമിക്കാന്‍ തുടങ്ങിയപ്പോള്‍ തന്നെ മയക്കുവെടിവച്ച് കടുവയെ പിടികൂടാന്‍ വനം വകുപ്പ് തീരുമാനിച്ചിരുന്നു. എന്നാല്‍ പത്തു സംഘങ്ങളായി നടത്തിയ തിരച്ചിലിലും കടുവയെ കണ്ടെത്താന്‍ കഴിഞ്ഞിരുന്നില്ല.
തോട്ടാമൂല ഫോറസ്റ്റ് ഓഫീസിന് സമീപം സ്ഥാപിച്ച കൂട്ടിലാണ് കടുവ കുടുങ്ങിയത്. കടുവയുടെ ആരോഗ്യം സംബന്ധിച്ച് പരിശോധനകള്‍ക്ക് ശേഷം തുടര്‍ നടപടികള്‍ സ്വീകരിക്കുമെന്നാണ് വനംവകുപ്പ് അറിയിച്ചു.
