ഷക്കീലയ്ക്ക് പ്രവേശനാനുമതി ഇല്ല; ഒമർ ലുലു ചിത്രത്തിന്റെ ട്രെയ്‌ലർ ലോഞ്ച് തടഞ്ഞു
നടി ഷക്കീല പങ്കെടുക്കുന്നതിനാല്‍ കോഴിക്കോട് ഹൈലൈറ്റ് മാളില്‍ സിനിമയുടെ ട്രെയിലർ ലോഞ്ച് തടഞ്ഞു. മാള്‍ അധികൃതര്‍ പ്രവേശനാനുമതി നിഷേധിച്ചെന്ന ആരോപണവുമായി സംവിധായകന്‍ ഒമര്‍ ലുലുവും ഷക്കീലയും രംഗത്തെത്തി. തന്റെ പുതിയ ചിത്രത്തിന്റെ ട്രെയിലര്‍ ലോഞ്ചിന് അതിഥിയായി ഷക്കീല എത്തുന്നതിനെ മാള്‍ അധികൃതര്‍ എതിര്‍ത്തെന്നും അതിനാല്‍ പരിപാടി നടത്തേണ്ട എന്ന് തീരുമാനിക്കുകയായിരുന്നുവെന്നും ഷക്കീലയ്‌ക്കൊപ്പം ഫേസ്ബുക്ക് ലൈവിലെത്തിയ ഒമര്‍ അറിയിച്ചു.
സുരക്ഷാപ്രശ്നങ്ങള്‍ മൂലമാണ് അനുമതി നിഷേധിച്ചതെന്നാണ് മാള്‍ അധികൃതരുടെ വിശദീകരണം. കഴിഞ്ഞ മാസം രണ്ട് പ്രമുഖ മലയാള നടിമാര്‍ക്ക് നേരേ ഇതേ മാളില്‍ അതിക്രമം നടന്നിരുന്നു.
മുന്‍കൂട്ടി അനുവാദം വാങ്ങിയ ശേഷമാണ് പരിപാടി നടത്താനുള്ള തയ്യാറെടുപ്പുകള്‍ നടത്തിയത്. എന്നാല്‍ മുഖ്യാതിഥി ഷക്കീലയാണെന്ന് അറിഞ്ഞതോടെ പരിപാടിക്ക് സംഘാടകര്‍ അനുമതി നിഷേധിക്കുകയായിരുന്നു. ഷക്കീലയെ ഒഴിവാക്കിയാല്‍ അനുവാദം നല്‍കാമെന്ന് മാള്‍ അധികൃതര്‍ അറിയിച്ചതായി ഒമര്‍ ലുലു 'ദ ഫോര്‍ത്തി' നോട് പറഞ്ഞു. മാള്‍ അധികൃതരുടെ കപട സദാചാരബോധമാണ് ഈ വിലക്കിന് പിന്നിലെന്നും ഒമര്‍ കൂട്ടിച്ചേർത്തു.
ഇതാദ്യമായല്ല ഇത്തരം അനുഭവമെന്നും കാലാകാലങ്ങളായി സിനിമയിലെന്ന പോലെ സമൂഹത്തിലും അവഗണനകള്‍ നേരിടേണ്ടി വരികയാണെന്നും ഷക്കീല ഫേസ്ബുക്ക് ലൈവില്‍ പറഞ്ഞു. ഒമര്‍ ലുലുവിന്റെ പുതിയ ചിത്രം 'നല്ല സമയ' ത്തിന്റെ ട്രെയിലര്‍ ലോഞ്ചായിരുന്നു ഇന്ന് വൈകിട്ട് ഏഴ് മണിക്ക് ഹൈലൈറ്റ് മാളില്‍ നടത്താന്‍ തീരുമാനിച്ചിരുന്നത്.
