പെരുമാതുറയിയിൽ ബോട്ട് മറിഞ്ഞ് രണ്ട് മരണം; അമ്പലപ്പുഴയില്‍ കടലിൽ കാണാതായ ഒരാളുടെ മൃതദേഹം കണ്ടെത്തി
തിരുവനന്തപുരം പെരുമാതുറയില്‍ മത്സ്യബന്ധനത്തിന് പോയ ബോട്ട് മറിഞ്ഞ് രണ്ട് പേർ മരിച്ചു. വര്‍ക്കല സ്വദേശികളായ ഷാനവാസ്, നിസാം എന്നിവരാണ് മരിച്ചത്. അമ്പലപ്പുഴയില്‍ കടലില്‍ വീണ മത്സ്യതൊഴിലാളി മരിച്ചു. അമ്പലപ്പുഴ പുതുവല്‍ വീട്ടില്‍ സന്തോഷ് ആണ് മരിച്ചത്.
വര്‍ക്കല സ്വദേശിയുടെ ഉടമസ്ഥതയിലുള്ള സഫാ മര്‍വ എന്ന ബോട്ടാണ് മുതലപ്പുഴയ്ക്ക് സമീപം മറിഞ്ഞത്. 24 പേരായിരുന്നു ബോട്ടിൽ ഉണ്ടായിരുന്നത്. ഇവരില്‍ 12 മ‍ത്സ്യത്തൊഴിലാളികള്‍ രക്ഷപ്പെട്ടു കരക്കെത്തി. ശക്തമായ കാറ്റിനെ തുടര്‍ന്നായിരുന്നു അപകടം. തീര സംരക്ഷണ സേനയുടെ കപ്പലുകളും അഡ്വാന്‍സ് ദ്രുവ് ഹെലികോപ്ടറും അടക്കം തെരച്ചിലിന് നേതൃത്വം നൽകി.
കാലില്‍ കയർ കുടുങ്ങിയതിനെ തുടര്‍ന്ന് കടലിൽ വീണ മത്സ്യതൊതഴിലാളിയാണ് അമ്പലപ്പുഴയില്‍ മരിച്ചത്. അമ്പലപ്പുഴ പുതുവല്‍ വീട്ടില്‍ സന്തോഷിന്റെ മൃതദേഹം പിന്നീട് കണ്ടെത്തി. മത്സ്യബന്ധനത്തിനിടെ ഉണ്ടായ ശക്തമായ കാറ്റിനെ തുടര്‍ന്ന് വള്ളം തീരത്തടുപ്പിക്കാന്‍ ശ്രമിക്കുമ്പോഴായിരുന്നു അപകടം.
