വനിത നിർമാതാവിൻ്റെ പരാതിയിൽ നടപടിയില്ല; നിർമാതാക്കളുടെ സംഘടനയ്ക്കെതിരെ ഡബ്ല്യുസിസി

നിർമാതാക്കളുടെ സംഘടനയ്‌ക്കെതിരെ വിമൻ ഇൻ സിനിമ കളക്ടീവ് (ഡബ്ല്യുസിസി). സംഘടനയുടെ തലപ്പത്തിരിക്കുന്ന നിർമാതാവിനെതിരെ വനിതാ നിർമാതാവ് നൽകിയ പരാതിയിന്മേൽ അന്വേഷണം നടക്കുന്ന സാഹചര്യത്തിലും അയാൾ സംഘടനയുടെ തലപ്പത്ത് നിന്നും മാറിനിൽക്കാതിരിക്കുന്നതിനെതിരെയാണ് ഡബ്ല്യുസിസി രംഗത്തെത്തിയിരിക്കുന്നത്.

സ്വയം 'സിനിമ മേഖലയിലെ തൊഴിലുടമകൾ' എന്ന് വിശേഷിപ്പിക്കുന്ന ഇവർ തങ്ങൾക്കു കീഴിൽ ജോലിചെയ്യുന്നവരുടെ സുരക്ഷ ഉറപ്പാക്കേണ്ടവരാണ്. അവർ ഇത്തരത്തിലൊരു ആരോപണമുണ്ടായിട്ടും നിർമാതാവിനെ സംഘടനയുടെ തലപ്പത്ത് നിന്നും മാറ്റിയില്ല എന്നാണ് ഡബ്ല്യുസിസി സമൂഹമാധ്യമങ്ങളിൽ പങ്കുവച്ച കുറിപ്പിലെ വിമർശനം.

സംഘടനയുടെ തലപ്പത്തിരിക്കുന്നവർക്കെതിരെ തന്റെ വ്യക്തിത്വത്തെ ഹനിക്കുന്നതും സ്ത്രീ എന്ന നിലയിൽ വിവേചനപരമായ പെരുമാറ്റവുമുണ്ടായി എന്നത് ഗുരുതരവും ആശങ്കാജനകവുമായ പരാതിയായാണ് തങ്ങൾ കാണുന്നതെന്നാണ് ഡബ്ല്യുസിസി പങ്കുവച്ച കുറിപ്പിൽ പറയുന്നു.

ആരോപണവിധേയരായവർ ഇപ്പോഴും സംഘടനയുടെ തലപ്പത്തിരിക്കുന്നതിലൂടെ തങ്ങൾ കുറ്റാരോപിതനൊപ്പമാണെന്ന് നിർമാതാക്കളുടെ സംഘടന തെളിയിക്കുകയാണെന്നും ഡബ്ല്യുസിസി വിമർശിച്ചു. ആരോപണം നേരിടുന്നവർ ധാർമികമായ ഉത്തരവാദിത്തമേറ്റെടുത്ത് സ്ഥാനങ്ങളിൽ നിന്ന് മാറി നിൽക്കാൻ മിനക്കെട്ടില്ല എന്ന വിമർശനമുന്നയിക്കുന്ന കുറിപ്പിൽ മലയാള സിനിമയെ നയിക്കേണ്ടത് കൃത്യമായ പ്രൊഫഷണൽ മൂല്യങ്ങളാണെന്നും അല്ലാതെ ഏതെങ്കിലും കാലഹരണപ്പെട്ട അധികാര സമവാക്യങ്ങൾക്കുള്ളിൽ തളച്ചിടപ്പെടുകയല്ല വേണ്ടതെന്നും പറയുന്നു.

പരാതിയുമായി രംഗത്തെത്തിയ വനിതാ നിർമാതാവിന് ഐക്യദാർഢ്യം പ്രഖ്യാപിക്കുന്ന ഡബ്ല്യുസിസി ഇവിടെ സ്വന്തം വഴിവെട്ടിത്തെളിക്കാൻ അസാമാന്യമായ ധൈര്യം ആവശ്യമാണെന്നും പറയുന്നു. ഹേമകമ്മറ്റി റിപ്പോർട്ടിൽ പ്രതിപാദിക്കുന്ന 'നിശബ്ദതയുടെ സംസ്കാരം' പ്രതിഷേധിക്കുന്നവരുടെ സ്വരങ്ങളെ എങ്ങനെ അടിച്ചമർത്തുന്നു എന്നതിന്റെ നേർസാക്ഷ്യമാണ് ഇതെന്നും ഓർമിപ്പിച്ചുകൊണ്ടാണ് കുറിപ്പ് അവസാനിപ്പിക്കുന്നത്.