ഉഷ സ്‌കൂള്‍ ഓഫ് അത്ലറ്റിക്സിലെ സഹപരിശീലക തൂങ്ങിമരിച്ച നിലയില്‍
കോഴിക്കോട് ബാലുശ്ശേരിയിലെ ഉഷ സ്‌കൂള്‍ ഓഫ് അത്ലറ്റിക്സിലെ സഹ പരിശീലകയെ മരിച്ച നിലയില്‍ കണ്ടെത്തി. കോയമ്പത്തൂര്‍ തൊണ്ടാമുത്തൂര്‍ സ്വദേശി ജയന്തി (27)യെയാണ് ഹോസ്റ്റല്‍ മുറിയില്‍ തൂങ്ങി മരിച്ച നിലയില്‍ കണ്ടെത്തിയത്. ഉഷാ സ്‌കൂളില്‍ ഒന്നരവര്‍ഷമായി സഹപരിശീലകയായി പ്രവര്‍ത്തിച്ചുവരികയായിരുന്നു ജയന്തി. ബാലുശ്ശേരി പൊലീസ് അസ്വഭാവിക മരണത്തില്‍ കേസെടുത്ത് അന്വേഷണം ആരംഭിച്ചിട്ടുണ്ട്. പുലര്‍ച്ചെ അഞ്ച് മണിയോടെയാണ് മരണം സംഭവിച്ചതെന്നാണ് പ്രാഥമിക നിഗമനം. വെള്ളിയാഴ്ച രാവിലെ അക്കാദമിയിലെ വിദ്യാര്‍ഥികളാണ് കോച്ചിനെ തൂങ്ങിമരിച്ച നിലയില്‍ കണ്ടെത്തിയത്.
ഒന്നരവര്‍ഷം മുമ്പാണ് ജയന്തി ഇവിടെ കോച്ചായി എത്തിയത്. കമ്പ്യൂട്ടര്‍ സയന്‍സിലും കായിക വിദ്യാഭ്യാസത്തിലും ബിരുദാനന്തര ബിരുദം നേടിയിട്ടുള്ളയാളാണ് ജയന്തി. മരണത്തിലേക്ക് നയിച്ച കാരണങ്ങള്‍ സംബന്ധിച്ച് കൂടുതല്‍ വിശദാംശങ്ങള്‍ ലഭ്യമായിട്ടില്ല. പോലീസ് കായിക വിദ്യാര്‍ഥികളുടെയും ജീവനക്കാരുടെയും മൊഴിയെടുക്കും.
