സുരേഷ് ഗോപിയും പവൻ കല്ല്യാണും മുതൽ കങ്കണയും രവികിഷനും വരെ; ലോക്സഭയിലേക്ക് എത്തുന്ന സിനിമാതാരങ്ങൾ
18-ാം ലോക്സഭയിലേക്കുള്ള തിരഞ്ഞെടുപ്പ് ഫല പ്രഖ്യാപനം പുറത്തുവന്നതോടെ പ്രതീക്ഷകളോടെയാണ് ഇരുമുന്നണികളും കരുക്കൾ നീക്കുന്നത്. ഒറ്റയ്ക്കുളള ഭൂരിപക്ഷം ഒരു പാർട്ടിക്കും നേടാൻ സാധിച്ചിട്ടില്ല. മുന്നണി സംവിധാനത്തിലൂടെ എൻഡിഎയ്ക്ക് ഭരിക്കാമെങ്കിലും ഇന്ത്യ മുന്നണിയും ഭരണത്തിന് വേണ്ടിയുള്ള നീക്കങ്ങൾ ശക്തമാക്കിയിരിക്കുകയാണ്.
വിജയിച്ച സ്ഥാനാർഥികളിൽ നിരവധി സിനിമാ - സീരിയൽ താരങ്ങളും ഉൾപ്പെടുന്നു എന്നതാണ് ഈ പ്രാവശ്യത്തെ പ്രത്യേകത. കേരളത്തിൽ ആദ്യമായി അക്കൗണ്ട് തുറന്ന ബിജെപി സ്ഥാനാർഥി സുരേഷ് ഗോപി മുതൽ ഹിമാചലിലെ മാണ്ഡിയിൽ നിന്ന് വിജയിച്ച കങ്കണ റണാവത്ത് വരെയുണ്ട് ഈ ലിസ്റ്റിൽ. 18-ാം ലോക്സഭയിലേക്ക് എത്തുന്ന അഭിനേതാക്കളിൽ ചിലർ ആരൊക്കെയാണെന്ന് നോക്കാം.
![](http://media.assettype.com/thefourthonline%2F2024-03%2F631ee599-5221-437a-ae9d-b6a228939156%2FSuresh_Gopi.jpg?w=640&auto=format%2Ccompress)
സുരേഷ് ഗോപി
ബിജെപിയുടെ കേരളത്തിലെ താരസ്ഥാനാർഥികളിൽ ഒരാളായ സുരേഷ് ഗോപി വലിയ വിജയമാണ് തൃശൂർ ലോക്സഭ മണ്ഡലത്തിൽ സ്വന്തമാക്കിയത്. 74686 വോട്ടുകൾ നേടിയാണ് സുരേഷ് ഗോപി മണ്ഡലത്തിൽ വിജയിച്ചത്. സിപിഐയുടെ വി എസ് സുനിൽകുമാറും കോൺഗ്രസിന്റെ കെ മുരളീധരനുമായിരുന്നു എതിർസ്ഥാനാർഥികൾ.
![](http://media.assettype.com/thefourthonline%2F2024-06%2F73961483-9913-4a7f-886b-1cf0033809ee%2F292146728_599853098172502_8776152271611953741_n.jpg?w=640&auto=format%2Ccompress)
പവൻ കല്യാൺ
തെലുങ്ക് സൂപ്പർസ്റ്റാറായ പവൻ കല്യാൺ ജനസേന പാർട്ടിയുടെ സ്ഥാപകനും നേതാവുമാണ്. ആന്ധ്രപ്രദേശിലെ പിതപുരത്ത് വൈഎസ്ആർസിപിയുടെ വംഗഗീത വിശ്വനാഥത്തെ പരാജയപ്പെടുത്തിയാണ് പവൻ 18 -ാം ലോക്സഭയിലേക്ക് എത്തുന്നത്.
![](http://media.assettype.com/thefourthonline%2F2024-06%2F0f85695b-2e7d-481a-9a77-6f427063fd4e%2Fgovil.jpg?w=640&auto=format%2Ccompress)
അരുൺ ഗോവിൽ
രാമാനന്ദ് സാഗറിന്റെ രാമായണം സീരിയലിൽ ശ്രീരാമനായി അഭിനയിച്ച അരുൺ ഗോവിലും വിജയിച്ച സ്ഥാനാർഥികളുടെ പട്ടികയിൽ ഇടംപിടിച്ചു. ഉത്തർപ്രദേശിലെ മീററ്റിലായിരുന്നു അരുൺ ഗോവിൽ മത്സരിച്ചത്. കടുത്ത മത്സരത്തിന് ഒടുവിലാണ് അരുൺ മീററ്റിൽ വിജയിച്ചത്.
![](http://media.assettype.com/thefourthonline%2F2024-06%2F69ffddc4-eb78-4d1b-a888-04fc7667736c%2FKangana%20Ranaut.webp?w=640&auto=format%2Ccompress)
കങ്കണ റണാവത്ത്
ബോളിവുഡ് താരവും ബിജെപി നേതാവുമായ കങ്കണ ഹിമാചൽ പ്രദേശിലെ മാണ്ഡിയിൽ നിന്നായിരുന്നു മത്സരിച്ചത്. കോൺഗ്രസ് സ്ഥാനാർഥി വിക്രമാദിത്യ സിങ്ങിനെയാണ് കങ്കണ മണ്ഡലത്തിൽ തോൽപ്പിച്ചത്.
![](http://media.assettype.com/thefourthonline%2F2024-06%2F2f973e68-5b73-473a-9eae-618f0f7b48ef%2F1278039-hemamalini.webp?w=640&auto=format%2Ccompress)
ഹേമമാലിനി
ബിജെപി സ്ഥാനാർഥിയായ ഹേമമാലിനി മഥുരയിൽ നിന്നാണ് വിജയിച്ചത്. 53.3 ശതമാനം വോട്ട് നേടിയാണ് ഹേമമാലിനി മണ്ഡലത്തിൽ നിന്ന് വിജയിച്ച് കയറിയത്. കോൺഗ്രസിന്റെ മുകേഷ് ധനഗർ ആയിരുന്നു എതിർസ്ഥാനാർഥി.
![](http://media.assettype.com/thefourthonline%2F2024-06%2Ff73bae9b-b6ba-46d0-b3ef-b6bd87002141%2Fsathruknan-sinha.gif?w=640&auto=format%2Ccompress)
ശത്രുഘ്നൻ സിൻഹ
പശ്ചിമബംഗാളിൽ അസൻസോൾ ലോക്സഭാ മണ്ഡലത്തിൽ തൃണമൂൽ കോൺഗ്രസ് സ്ഥാനാർഥിയായിട്ടായിരുന്നു ശത്രുഘ്നൻ സിൻഹ മത്സരിച്ചത്. 59,564 വോട്ടുകൾ നേടിയാണ് ശത്രുഘ്നൻ സിൻഹ മണ്ഡലത്തിൽ വിജയിച്ചത്. മുൻ കേന്ദ്രമന്ത്രിയും ബിജെപി സ്ഥാനാർഥിയുമായ സുരേന്ദ്രജീത് സിംഗ് അലുവാലിയയിരുന്നു ശത്രുഘ്നൻ സിൻഹയുടെ പ്രധാന എതിരാളി.
![](http://media.assettype.com/thefourthonline%2F2024-06%2F806e6381-48e4-47f6-a108-02d736bb5fde%2Fmanoj-tiwari-1715045463.jpg?w=640&auto=format%2Ccompress)
മനോജ് തിവാരി
ഭോജ്പൂരി താരമായ മനോജ് തിവാരി ബിജെപി സ്ഥാനാർഥിയായിട്ടായിരുന്നു മത്സരിച്ചത്. നോർത്ത് ഈസ്റ്റ് ഡൽഹിയിൽ നിന്ന് മത്സരിച്ച മനോജ് തിവാരി കോൺഗ്രസ് സ്ഥാനാർഥി കനയ്യകുമാറിനെയാണ് പരാജയപ്പെടുത്തിയത്.
![](http://media.assettype.com/thefourthonline%2F2024-06%2F44a49567-7ff0-4481-8280-2c6abec63a09%2FPTI12-08-2022-000068B-0_1670641267217_1670641267217_1717488907774.avif?w=640&auto=format%2Ccompress)
രവി കിഷൻ
ഭോജ്പുരി നടനായ രവികിഷൻ ബിജെപി സ്ഥാനാർഥിയായിട്ടായിരുന്നു മത്സരിച്ചത്. ഉത്തർപ്രദേശിലെ ഗോരഖ്പൂർ മണ്ഡലത്തിൽ നിന്ന് എസ്പിയുടെ കാജൽ നിഷാദിനെ ഒരു ലക്ഷത്തിലധികം വോട്ടുകൾക്ക് പരാജയപ്പെടുത്തിയാണ് രവി കിഷൻ വിജയിച്ചത്.
![](http://media.assettype.com/thefourthonline%2F2024-06%2Fb97291b7-8e7a-4c4c-b825-1716724e6d33%2F1678893155_dev.jpg?w=640&auto=format%2Ccompress)
ദേവ് അധികാരി
ബംഗാളി നടനായ ദേവ് അധികാരി തൃണമൂൽ സ്ഥാനാർഥിയായി പശ്ചിമബംഗാളിലെ ഘട്ടൽ മണ്ഡലത്തിലായിരുന്നു മത്സരിച്ചത്. ബംഗാളി നടനായ ഹിരൺ ചാറ്റർജിയായിരുന്നു എതിർസ്ഥാനാർത്ഥിയെങ്കിലും 1,82,868 വോട്ടുകളുടെ ഭൂരിപക്ഷത്തിൽ ദേവ് അധികാരി വിജയിക്കുകയിരുന്നു.
![](http://media.assettype.com/thefourthonline%2F2024-06%2F6709d80e-bdfb-4dda-86b5-87cd8b0d3f42%2F1676700683_new-project-2023-02-18t113925-280.jpg?w=640&auto=format%2Ccompress)
രചന ബാനർജി
ബംഗാളിൽ താരപോരാട്ടം നടന്ന മറ്റൊരു മണ്ഡലമായിരുന്നു ഹുഗ്ലി. ബംഗാളി നടിമാരായ രചന ബാനർജി തൃണമൂൽ കോൺഗ്രസിന് വേണ്ടിയും ലോക്കറ്റ് ചാറ്റർജി ബിജെപിക്ക് വേണ്ടിയും മത്സരിച്ചു. കടുത്ത മത്സരത്തിന് ഒടുവിൽ രചന ബാനർജി 60,000 വോട്ടുകൾക്ക് വിജയിക്കുകയായിരുന്നു.
![](http://media.assettype.com/thefourthonline%2F2024-06%2F59973969-b46b-4c32-becd-5ffa194901f2%2Fbea0e16e-56fd-11eb-835f-a5f2f7642211_1610876875972_1610876902094.webp?w=640&auto=format%2Ccompress)
സതാബ്ദി റോയ്
ബംഗാളി നടിയും മൂന്ന് തവണ തൃണമൂൽ എംപിയുമായ സതാബ്ദി റോയ് ബിർഭൂം മണ്ഡലത്തിൽ നിന്നാണ് വിജയിച്ചത്.