ഭൂമിക്ക് സമീപത്തേക്ക് അഞ്ച് കൂറ്റൻ ഛിന്നഗ്രഹങ്ങൾ; മുന്നറിയിപ്പ് നൽകി നാസ

വരും ദിവസങ്ങളിൽ ഭൂമിക്ക് സമീപത്തുകൂടി ഭീമൻ ഛിന്നഗ്രഹങ്ങൾ കടന്നുപോകുമെന്ന് നാസ. ഒക്ടോബർ 26 മുതൽ 28 വരെ അഞ്ച് ഛിന്നഗ്രഹങ്ങൾ ഭൂമിക്ക് സമീപത്ത് കൂടി കടന്ന്പോകുമെന്ന് നാസയുടെ ജെറ്റ് പ്രൊപ്പൽഷൻ ലബോറട്ടറി വ്യക്തമാക്കി. കൂട്ടത്തിൽ ഏറ്റവും വലുപ്പമുള്ള ഡബ്ല്യുജി 2000 ത്തിന് 500 അടിയാണ് വലിപ്പം. ഉയരമുള്ള ഒരു കെട്ടിടത്തിന്റെ അത്രയും വരും ഇത്.

ഡബ്ല്യുജി 2000 ഒക്‌ടോബർ 28-ന് ഭൂമിയുടെ 3,330,000 കിലോമീറ്റർ അകലത്തിലൂടെ സുരക്ഷിതമായി ഭൂമിയെ കടന്ന് പോകും. ഭീമന്മാരായ ഈ ഛിന്നഗ്രഹങ്ങൾ ഭൂമിക്ക് യാതൊരു അപകടവും ഉണ്ടാക്കില്ലെന്നാണ് നാസ വ്യക്തമാക്കുന്നത്. 2024 TB2, 2007 UT3, 2016 BF1 മറ്റ്‌ മൂന്ന് ഛിന്നഗ്രഹങ്ങളും ഈ ദിവസങ്ങളിൽ ഭൂമിയെ കടന്ന് പോകും. ഇവക്ക് ഏകദേശം ഒരു വിമാനത്തിന്റെ വലിപ്പമുണ്ടാകുമെന്നാണ് കരുതുന്നത്.

2024 ഒക്ടോബർ 26-ന്, യഥാക്രമം 7,31,000 കിലോമീറ്ററും 4,200,000 കിലോമീറ്ററും അകലെ ഭൂമിയുടെ ഏറ്റവും സമീപത്ത് കൂടി സുരക്ഷിതമായി കടന്നുപോകും. 2016 BF 1 ഒക്ടോബർ 27 നാണ് ഭൂമിയുടെ ഏറ്റവും അടുത്ത് എത്തുക. ഭൂമിയുടെ 2,460,000 കി.മീ അടുത്തുകൂടി സുരക്ഷിതമായി ഛിന്നഗ്രഹം കടന്നുപോകും.

കൂട്ടത്തിൽ ഏറ്റവും ചെറുതിന്റെ പേര് 2024 UQ1 എന്നാണ്. ഏകദേശം ഒരു ബസിന്റെ വലിപ്പമാണ് ഇതിനുള്ളത്. ഈ ഛിന്നഗ്രഹം ഒക്ടോബർ 28 ന് 1,48,000 കിലോമീറ്റർ ദൂരത്തിൽ ഭൂമിയോട് ഏറ്റവും അടുത്ത് എത്തും. എന്നാലും വലിപ്പത്തിൽ കുഞ്ഞനായതിനാൽ ഇത് ഭൂമിക്ക് വലിയ അപകടം സൃഷ്ടിക്കില്ല.

സൗരയൂഥത്തിൽ സൂര്യനു ചുറ്റും ഭ്രമണം ചെയ്യുന്ന ഗ്രഹങ്ങളേക്കാൾ ചെറുതും ഉൽക്കകളേക്കാൾ വലുതുമായ വസ്തുക്കളാണ്‌ ഛിന്നഗ്രഹങ്ങൾ അഥവാ ആസ്റ്ററോയ്ഡ്. ചൊവ്വയ്ക്കും വ്യാഴത്തിനും ഇടയിലുള്ള ഛിന്നഗ്രഹവലയത്തിലാണ് ഭൂരിഭാഗം ഛിന്നഗ്രഹങ്ങളും സ്ഥിതി ചെയ്യുന്നത്. ദൂരദര്‍ശിനികളിലൂടെ നോക്കുമ്പോള്‍ ഒരു പ്രകാശ കേന്ദ്രമായാണ് ഇവയെ കാണുക.

ഉരുണ്ടതും നീളമുള്ളതുമായ പല രൂപത്തിൽ ഛിന്നഗ്രഹങ്ങളെ കാണാം. ചിലതിന് ഉപഗ്രഹങ്ങളുമുണ്ടാകും. ഛിന്നഗ്രഹത്തെക്കുറിച്ചുള്ള പഠനം ഭൂമിയുടെ ഉത്ഭവത്തെക്കുറിച്ചുള്ള അറിവുകള്‍ക്ക് സഹായകരമാകും. പല വലിപ്പത്തിൽ ഈ ഛിന്നഗ്രഹങ്ങൾ കാണാറുണ്ട്. ഭൂമിയിൽ കൂട്ടിയിടിച്ച് വലിയ ദുരന്തങ്ങളുണ്ടാക്കാനും ഛിന്നഗ്രഹത്തിന് സാധിക്കും.