വാർണർ ഡൽഹി ടെസ്റ്റിൽ തുടർന്ന് കളിക്കില്ല; മാത്യൂ റെൻഷോ കൺകഷൻ സബ്സ്റ്റിറ്റ്യൂട്ട്
പരുക്കിനെ തുടർന്ന് ഓസ്ട്രേലിയൻ താരം ഡേവിഡ് വാർണർ ഇന്ത്യയ്ക്കെതിരായ രണ്ടാം ടെസ്റ്റിൽ നിന്ന് പുറത്തായി. തുടർന്ന് കളിക്കാനാകാത്തതിനാൽ വാർണർക്ക് പകരക്കാരനായി മാത്യൂ റെൻഷോയെ ടീമിൽ ഉൾപ്പെടുത്തിയതായി ക്രിക്കറ്റ് ഓസ്ട്രേലിയ അറിയിച്ചു. ബോര്‍ഡര്‍-ഗാവസ്‌കര്‍ ട്രോഫിയിലെ രണ്ടാം മത്സരത്തിനിടെ മുഹമ്മദ് സിറാജിന്റെ പന്തിൽ വാർണർക്ക് പരുക്കേറ്റിരുന്നു. കൺകഷൻ സബ്സ്റ്റിറ്റ്യൂഷനായാണ് മാത്യൂ റെൻഷോയെ ടീമിൽ ഉൾപ്പെടുത്തി.
ആദ്യ ഇന്നിങ്സിലെ എട്ടാം ഓവറില്‍ മുഹമ്മദ് സിറാജിന്റെ ബൗണ്‍സറേറ്റ് വാര്‍ണറുടെ കൈമുട്ടിന് പരുക്കേറ്റിരുന്നു. പന്ത് ഗ്ലൗസില്‍ തട്ടിയ ശേഷം കൈമുട്ടില്‍ പതിക്കുകയായിരുന്നു. ഉടന്‍ മെഡിക്കല്‍ സംഘം പരിശോധിച്ച ശേഷമാണ് വാര്‍ണര്‍ ബാറ്റിങ് തുടർന്നത്. ഇതുകൂടാതെ രണ്ട് തവണ പന്ത് ഹെൽമറ്റിലും തട്ടി. ഔട്ടാകും വരെ ബാറ്റിങ് തുടർന്നെങ്കിലും ഇന്ത്യൻ ഇന്നിങ്സ് സമയത്ത് വാർണർ ഫീൽഡിൽ ഇറങ്ങിയിരുന്നില്ല. 44 പന്തില്‍ 15 റണ്‍സെടുത്ത വാര്‍ണറെ മുഹമ്മദ് ഷമി മടക്കി.
വാർണർ ഫീൽഡിലിറങ്ങാതായതോടെ ആശങ്കകൾ ഉയർന്നിരുന്നു. മെഡിക്കൽ സംഘം പരിശോധന നടത്തിയതിന് ശേഷമാണ് ഇപ്പോൾ ശേഷിക്കുന്ന ദിവസം വാർണർ കളിക്കില്ലെന്ന് ഓസ്ട്രേലിയൻ ക്രിക്കറ്റ് ബോർഡ് അറിയിച്ചത്. ഇന്ത്യയ്ക്കെതിരെ താരത്തിന് ഫോമിലേക്ക് ഉയരാൻ സാധിച്ചിരുന്നില്ല.
