വിരലിനു പരുക്ക്; ബട്‌ലറിന് അടുത്ത മത്സരം നഷ്ടമായേക്കും
ഇന്ത്യന്‍ പ്രീമിയര്‍ ലീഗില്‍ രാജസ്ഥാന് റോയല്‍സിനെ വെടിക്കെട്ട് ഓപ്പണര്‍ ജോസ് ബട്‌ലറിന് അടുത്ത മത്സരം നഷ്ടമായേക്കും. ഇന്നലെ പഞ്ചാബ് കിങ്‌സിനെതിരായ മത്സരത്തിനിടെ കൈവിരലിനേറ്റ പരുക്കാണ് താരത്തിനു വിനയായത്.
മത്സരത്തില്‍ ഫീല്‍ഡിങ്ങിനിടെയാണ് താരത്തിനു പരുക്കേറ്റത്. തുടര്‍ന്ന് കൈവിരലില്‍ ഒന്നിലേറെ സ്റ്റിച്ച് ഇടേണ്ടി വന്നു. ഇതേത്തുടര്‍ന്നാണ് ഡല്‍ഹി ക്യാപിറ്റല്‍സിനെതിരായ രാജസ്ഥാന്റെ അടുത്ത മത്സരത്തില്‍ താരത്തിനു വിശ്രമം അനുവദിക്കാന്‍ ടീം മാനേജ്‌മെന്റ് ആലോചിക്കുന്നത്.
ഇന്നലെ രാജസ്ഥാന് ചേസിങ്ങിനിറങ്ങിയപ്പോള്‍ പരുക്കിനെത്തുടര്‍ന്ന് ബട്‌ലറിന് ഓപ്പണ്‍ ചെയ്യാനും കഴിഞ്ഞില്ല. ബട്‌ലറിനു പകരം രവിചന്ദ്രന്‍ അശ്വിനെ ഓപ്പണറാക്കി പരീക്ഷിച്ചെങ്കിലും പാളിപ്പോയിരുന്നു. നാലു പന്ത് നേരിട്ട അശ്വിന്‍ പൂജ്യത്തിനാണ് പുറത്തായത്. മത്സരത്തില്‍ അഞ്ചു റണ്‍സിനു തോറ്റ രാജസ്ഥാന് ഇത് വളരെ നിര്‍ണായകമാകുകയും ചെയ്തു.
ഇന്നലെ ജേസണ്‍ ഹോള്‍ഡര്‍ എറിഞ്ഞ പഞ്ചാബ് ഇന്നിങ്‌സിന്റെ അവസാന ഓവറിലെ രണ്ടാം പന്തിലാണ് ബട്‌ലറിനു പരുക്കേറ്റത്. പരുക്കേറ്റിട്ടും ചോരയൊലിക്കുന്ന കൈയുമായി ഫീല്‍ഡ് ചെയ്ത ബട്‌ലര്‍ ഓവര്‍ പൂര്‍ത്തിയാക്കിയ ശേഷമാണ് ചികിത്സ തേടിയത്.
