അഴിഞ്ഞാടി റസല്‍; അവസരത്തിനൊത്തുയര്‍ന്ന് നൈറ്റ് റൈഡേഴ്‌സ്‌
ഒടുവില്‍ ആന്ദ്രെ റസല്‍ അഴിഞ്ഞാടി. നിര്‍ണായക മത്സരത്തില്‍ സൂപ്പര്‍ താരം മിന്നും പ്രകടനം പുറത്തെടുത്തപ്പോള്‍ പ്ലേഓഫ് പ്രതീക്ഷ നിലനിര്‍ത്തി കൊല്‍ക്കത്ത നൈറ്റ് റൈഡേഴ്‌സിന് തകര്‍പ്പന്‍ ജയം. ഇന്ന് കൊല്‍ക്കത്ത ഈഡന്‍ ഗാര്‍ഡന്‍സില്‍ നടന്ന മത്സരത്തില്‍ ആദ്യം ബാറ്റ് ചെയ്ത പഞ്ചാബ് കിങ്‌സ് ഏഴു വിക്കറ്റ് നഷ്ടത്തില്‍ 179 റണ്‍സാണ് നേടിയത്.
മറുപടി ബാറ്റിങ്ങിനിറങ്ങിയ കൊല്‍ക്കത്ത അവസാന പന്തില്‍ അഞ്ചു വിക്കറ്റ് നഷ്ടത്തില്‍ ലക്ഷ്യം കൊയ്യുകയായിരുന്നു. അവസാന ഓവറുകളില്‍ തകര്‍ത്തടിച്ച് 23 പന്തുകളില്‍ നിന്ന് മൂന്നു ബൗണ്ടറികളും മൂന്നു സിക്‌സറുകളും സഹിതം 42 റണ്‍സ് നേടിയ ആന്ദ്രെ റസലാണ് അവരുടെ വിജയശില്‍പി.
റസലിനു പുറമേ 38 പന്തുകളില്‍ നിന്ന് 51 റണ്‍സ് നേടിയ നായകന്‍ നിതീഷ് റാണയും 24 പന്തുകളില്‍ നിന്ന് 38 റണ്‍സ് നേടിയ ഓപ്പണര്‍ ജേസണ്‍ റോയിയുമാണ് കൊല്‍ക്കത്തയ്ക്കായി തിളങ്ങിയത്. 10 പന്തില്‍ 21 റണ്‍സുമായി റിങ്കുസിങ് പുറത്താകാതെ നിന്നു. ജയത്തോടെ പോയിന്റ് ടേബിളില്‍ അഞ്ചാമതെത്താനും അവര്‍ക്കായി.
നേരത്തെ തുടക്കം തകര്‍ച്ചയോടെ ആയിരുന്നെങ്കിലും ഒരറ്റത്തു പിടിച്ചു നിന്ന നായകന്‍ ശിഖര്‍ ധവാനാണ് പഞ്ചാബിനെ അല്‍പമെങ്കിലും മാന്യമായ സ്‌കോറിലേക്ക് നയച്ചത്. 47 പന്തുകളില്‍ നിന്ന് ഒമ്പതു ബൗണ്ടറികളും ഒരു സിക്‌സറും സഹിതം 57 റണ്‍സ് നേടിയ ധവാനാണ് ടീമിന്റെ ടോപ് സ്‌കോറര്‍.
ധവാനു പുറമേ മറ്റാര്‍ക്കും പഞ്ചാബ്‌നിരയില്‍ പിടിച്ചു നില്‍ക്കാനായില്ല. 18 പന്തുകളില്‍ നിന്ന് രണ്ടു സിക്‌സറുകള്‍ സഹിതം 21 റണ്‍സ നേടിയ ജിതേഷ് ശര്‍മയും 11 പന്തുകളില്‍ നിന്ന് ഒരോ ഫോറും സിക്‌സറും സഹിതം 19 റണ്‍സ് നേടിയ റിഷ ധവാനുമാണ് മറ്റു പ്രധാന സ്‌കോറര്‍മാര്‍.
ഓപ്പണര്‍ പ്രഭ്‌സിമ്രാന്‍ സിങ്(12), മധ്യനിര താരങ്ങളായ ഭനുക രജപക്‌സെ(0), ഓള്‍റൗണ്ടര്‍ാരായ ലിയാം ലിവിങ്‌സ്റ്റണ്‍(15) എന്നിവര്‍ നിരാശപ്പെടത്തി. അവസാന ഓവറുകളില്‍ തകര്‍ത്തടിച്ച ഷാരൂഖ് ഖാന്‍(21 നോട്ടൗട്ട്) ഹര്‍പ്രീത് ബ്രാര്‍(17 നോട്ടൗട്ട്) എന്നിവരാണ് ടീമിനെ 170 കടത്തിയത്. അവസാന ഓവറില്‍ ഇരുവരും ചേര്‍ന്ന് 21 റണ്‍സാണ് നേടിയത്.
കൊല്‍ക്കത്തയ്ക്കു വേണ്ടി നാലോവറില്‍ 26 റണ്‍സ് വഴങ്ങി മൂന്നു വിക്കറ്റ് വീഴ്ത്തിയ സ്പിന്നര്‍ വരുണ്‍ ചക്രവര്‍ത്തിയാണ് ബൗളിങ്ങില്‍ തിളങ്ങിയത്. രണ്ടു വിക്കറ്റുകളുമായി ഹര്‍ഷിത് റാണയും ഓരോ വിക്കറ്റുകളുമായി സുയാഷ് ശര്‍മ, നിതീഷ് റാണ എന്നിവരും മികച്ച പിന്തുണ നല്‍കി.
