'അടി'തെറ്റി ഇന്ത്യ; വിന്‍ഡീസിന് നാല്‌ റണ്‍സിന്റെ ത്രസിപ്പിക്കുന്ന ജയം

വെസ്റ്റിന്‍ഡീസിനെതിരായ ട്വന്റി 20 ക്രിക്കറ്റ് പരമ്പരയിലെ ആദ്യ മത്സരത്തില്‍ ഇന്ത്യക്ക് നാല്‌ റണ്‍സിന്റെ ദയനീയ തോല്‍വി. ട്രിനിഡാഡിലെ ബ്രയാന്‍ ലാറ ക്രിക്കറ്റ് സ്‌റ്റേഡിയത്തില്‍ നടന്ന മത്സരത്തില്‍ വിന്‍ഡീസ് ഉയര്‍ത്തിയ 150 റണ്‍സ് വിജയലക്ഷ്യം പിന്തുടര്‍ന്ന ഇന്ത്യക്ക് നിശ്ചിത 20 ഓവറില്‍ ഒമ്പത് വിക്കറ്റ് നഷ്ടത്തില്‍ 145 റണ്‍സ് എടുക്കാനേ കഴിഞ്ഞുള്ളു.

മുന്‍നിര ബാറ്റിങ് നിര അമ്പേ പരാജയപ്പെട്ടതാണ് ഇന്ത്യക്ക് തിരിച്ചടിയായത്. അരങ്ങേറ്റ മത്സരം കളിക്കാനിറങ്ങിയ തിലക് വര്‍മയ്ക്കു മാത്രമാണ് ഇന്ത്യന്‍ നിരയില്‍ പൊരുതാനായത്. 22 പന്തുകളില്‍ നിന്ന് രണ്ടു ബൗണ്ടറികളും മൂന്നു സിക്‌സറുകളും സഹിതം 39 റണ്‍സാണ് തിലക് നേടിയത്. ഇന്ത്യന്‍ പ്രീമിയര്‍ ലീഗില്‍ മുംബൈ ഇന്ത്യന്‍സിനായി കാഴ്ചവച്ച മികച്ച പ്രകടനം തിലക് ടീം ഇന്ത്യയുടെ ജഴ്‌സിയിലും ആവര്‍ത്തിക്കുകയായിരുന്നു.

തിലകിനു പുറമേ 21 പന്തുകളില്‍ നിന്ന് 21 റണ്‍സ് നേടിയ സൂര്യകുമാര്‍ യാദവ്, 19 പന്തുകളില്‍ നിന്ന് 19 റണ്‍സ് നേടിയ നായകന്‍ ഹാര്‍ദ്ദിക് പാണ്ഡ്യ, 11 പന്തില്‍ നിന്ന് 13 റണ്‍സ് നേടിയ അക്‌സര്‍ പട്ടേല്‍, 12 പന്തില്‍ 12 റണ്‍സ് നേടിയ സഞ്ജു സാംസണ്‍ എന്നിവരാണ് മറ്റു സ്‌കോറര്‍മാര്‍. ഓപ്പണര്‍മാരായ ഇഷാന്‍ കിഷന്‍(6), ശുഭ്മാന്‍ ഗില്‍(3), വാലറ്റതാരം കുല്‍ദീപ് യാദവ്(3) എന്നിവര്‍ നിരാശപ്പെടുത്തി. യൂസ്‌വേന്ദ്ര ചഹാല്‍(1), മുകേഷ് കുമാര്‍(1) എന്നിവര്‍ പുറത്താകാതെ നിന്നു.

നാലോവറില്‍ വെറും 19 റണ്‍സ് മാത്രം വഴങ്ങി രണ്ടു വിക്കറ്റ് വീഴ്ത്തിയ ഓള്‍റൗണ്ടര്‍ ജേസണ്‍ ഹോള്‍ഡറാണ് ഇന്ത്യയെ തകര്‍ത്തത്. രണ്ടു വിക്കറ്റുകളുമായി ഒബെഡ് മക്‌കോയ്, റൊമാരിയോ ഷെപ്പേര്‍ഡ് എന്നിവര്‍ മികച്ച പിന്തുണ നല്‍കി. അഖീല്‍ ഹൊസെയ്‌നാണ് ശേഷിച്ച ഒരു വിക്കറ്റ്.

നേരത്തെ ടോസ് നേടി ആദ്യം ബാറ്റ് ചെയ്ത വെസ്റ്റിന്‍ഡീസ് തുടക്കത്തിലെ തകര്‍ച്ചയ്ക്കു ശേഷം മധ്യനിരയുടെ കരുത്തിലാണ് മാന്യമായ സ്‌കോറിലേക്ക് എത്തിയത്. നായകന്‍ റോവ്മാന്‍ പവലിന്റെയും വിക്കറ്റ് കീപ്പര്‍ ബാറ്റര്‍ നിക്കോളാസ് പുരാന്റെയും മികച്ച ബാറ്റിങ്ങാണ് അവര്‍ക്കു തുണയായത്. 32 പന്തുകളില്‍ നിന്ന് മൂന്നു വീതം സിക്‌സറും ബൗണ്ടറികളും സഹിതം 48 റണ്‍സ് നേടിയ പവലാണ് ടോപ്‌സ്‌കോറര്‍.

34 പന്തുകളില്‍ നിന്ന് രണ്ടു വീതം ബൗണ്ടറികളും സിക്‌സറുകളും സഹിതം 41 റണ്‍സ് നേടിയ പൂരാന്‍ നായകനു മികച്ച പിന്തുണ നല്‍കി. 19 പന്തുകളില്‍ നിന്ന് നാലു ബൗണ്ടറികളും ഒരു സിക്‌സറും സഹിതം 28 റണ്‍സ് നേടിയ ഓപ്പണര്‍ ബ്രാന്‍ഡണ്‍ കിങ്, 12 പന്തില്‍ 10 റണ്‍സ് നേടിയ ഷിംറോണ്‍ ഹെറ്റ്മയര്‍ എന്നിവരാണ് രണ്ടക്കം കടന്ന മറ്റ് വിന്‍ഡീസ് ബാറ്റര്‍മാര്‍.

ഓപ്പണര്‍ കൈല്‍ മേയേഴ്‌സ്(1), മധ്യനിര താരം ജോണ്‍സണ്‍ ചാള്‍സ്(3) എന്നിവര്‍ നിരാശപ്പെടുത്തിയപ്പോള്‍ നാലു റണ്‍സുമായി റൊമാരിയോ ഷെപ്പേര്‍ഡും ആറു റണ്‍സുമായി ജേസണ്‍ ഹോള്‍ഡറും പുറത്താകാതെ നിന്നു. ഇന്ത്യക്കു വേണ്ടി പേസര്‍ അര്‍ഷ്ദീപ് സിങ് സ്പിന്നര്‍ യൂസ്‌വേന്ദ്ര ചഹാല്‍ എന്നിവര്‍ രണ്ടു വിക്കറ്റ് വീതം വീഴ്ത്തിയപ്പോള്‍ നായകന്‍ ഹാര്‍ദ്ദിക് പാണ്ഡ്യ, സ്പിന്നര്‍ കുല്‍ദീപ് യാദവ് എന്നിവര്‍ ഓരോ വിക്കറ്റ് വീതം നേടി.