ഉയർന്ന ബാറ്റിങ് ശരാശരിയുള്ള ഓസ്‌ട്രേലിയൻ ഓപ്പണർ; ടെസ്റ്റ് ക്രിക്കറ്റ് ചരിത്രത്തിൽ റെക്കോഡുമായി ഉസ്മാൻ ക്വാജ
ടെസ്റ്റ് ക്രിക്കറ്റിൽ ചരിത്ര നേട്ടവുമായി ഓസ്‌ട്രേലിയൻ ഓപ്പണർ ഉസ്മാൻ ക്വാജ. ആഷസ് പരമ്പരയിൽ ഒരു സെഞ്ചുറിയും മൂന്ന് അർദ്ധ സെഞ്ചുറികളും നേടിയ ക്വാജ ഓപ്പണറെന്ന നിലയില്‍ ഏറ്റവും ഉയർന്ന ബാറ്റിങ് ശരാശരിയുള്ള ഓസ്‌ട്രേലിയൻ താരമെന്ന നേട്ടവും ഏറ്റവും ഉയർന്ന ബാറ്റിങ് ശരാശരിയുള്ള ലോകത്തെ രണ്ടാമത്തെ താരമെന്ന നേട്ടവും സ്വന്തമാക്കി. ഇത്തവണത്തെ ആഷസ് പരമ്പരയില്‍ ആകെ അഞ്ച് മത്സരങ്ങളിൽ നിന്നായി 49.6 റൺസ് ശരാശരിയിൽ 496 റണ്‍സാണ് നേടിയത്.
44 ടെസ്റ്റ് മത്സരങ്ങളിലാണ് ക്വാജ ഓപ്പണറായി ഇറങ്ങിയിട്ടുള്ളത്. ഇതില്‍ നിന്ന് 60.58 ശരാശരിയിൽ ആകെ 2,363 റൺസാണ് താരം നേടിയത്. 195 ആണ് താരത്തിന്റെ ഏറ്റവുമുയർന്ന സ്കോർ.
2023 ലെ ആഷസ് പരമ്പരയിൽ മികച്ച പ്രകടനമായിരുന്നു ക്വാജ കാഴ്ച വച്ചത്. 10 ഇന്നിംഗ്‌സുകളിൽ നിന്നായി 49.60 ശരാശരിയിൽ 496 റൺസാണ് താരം അടിച്ചു കൂട്ടിയത്. 141 ആണ് ഏറ്റവുമുയർന്ന സ്കോർ. ഇംഗ്ലണ്ടിലെ കന്നി സെഞ്ചുറി കൂടിയായിരുന്നു താരത്തിന്റേത്. ഇംഗ്ലണ്ടിന്റെ ഹെർബേട്ട് സറ്റ്ക്ലിഫാണ് പട്ടികയിൽ ഒന്നാമത്.
