രണ്ടു ഗോള്‍ ജയം; ഗോകുലം കേരള മൂന്നാം സ്ഥാനത്ത്
ഐ ലീഗ് ഫുട്‌ബോളില്‍ തകര്‍പ്പന്‍ ജയവുമായി പോയിന്റ് പട്ടികയില്‍ മൂന്നാം സ്ഥാനത്തേക്ക് ഉയര്‍ന്നു ഗോകുലം കേരള. ഇന്നു സ്വന്തം തട്ടകമായി കോഴിക്കോട് ഇ.എം.എസ്. കോര്‍പറേഷന്‍ സ്‌റ്റേഡിയത്തില്‍ നടന്ന മത്സരത്തില്‍ എതിരില്ലാത്ത രണ്ടു ഗോളുകള്‍ക്ക് റയല്‍ കശ്മീരിനെയാണ് ഗോകുലം തോല്‍പിച്ചത്.
ഇരുപകുതികളിലുമായി താഹിര്‍ സമനും മലയാളി താരം ജോബി ജസ്റ്റിനുമാണ് ഗോകുലത്തിന്റെ ഗോളുകള്‍ നേടിയത്. ആദ്യ പകുതിയില്‍ ആതിഥേയര്‍ ഒരു ഗോളിനു മുന്നിട്ടു നില്‍ക്കുകയായിരുന്നു.
മത്സരത്തിന്റെ 35-ാം മിനിറ്റിലായിരുന്നു താഹിര്‍ സ്‌കോര്‍ ചെയ്തത്. ശ്രീക്കുട്ടന്‍ നല്‍കിയ ക്രോസിനു തലവച്ചായിരുന്നു താഹിറിന്റെ സ്‌കോറിങ്. ഇതു തുടര്‍ച്ചയായ രണ്ടാം മത്സരത്തിലാണ് താഹിര്‍ ഗോകുലത്തിനായി സ്‌കോര്‍ ചെയ്യുന്നത്. ആദ്യ പകുതിയില്‍ ഈ ഗോളിന്റെ ലീഡില്‍ പിരിഞ്ഞ ഗോകുലം രണ്ടാം പകുതിയിലും നിരാശപ്പെടുത്തിയില്ല.
തുടരെ ആക്രമണങ്ങള്‍ നടത്തിയെങ്കിലും പക്ഷേ അവര്‍ക്ക് ഗോള്‍നില ഉയര്‍ത്താന്‍ 86-ാാം മിനിറ്റ് വരെ കാത്തിരിക്കേണ്ടി വന്നു. ഒമര്‍ റാമോസ് നല്‍കിയ ക്രോസില്‍ ഒരു ഡൈവിങ് ഹെഡറിലൂടെയാണ് ജോബി വലകുലുക്കിയത്.
ജയത്തോടെ 12 മത്സരങ്ങളില്‍ നിന്ന് ആറു ജയവും മൂന്നു സമനിലയുമടക്കം 21 പോയിന്റുമായാണ് ഗോകുലം മൂന്നാം സ്ഥാനത്തേക്കു കയറിയത്. 25 പോയിന്റുള്ള ശ്രീനിധി എഫ്.സിയും 23 പോയിന്റുള്ള റൗണ്ട്ഗ്ലാസ് പഞ്ചാബുമാണ് ആദ്യ രണ്ടു സ്ഥാനങ്ങളില്‍.
