തോല്‍വിയറിയാതെ; ഒറ്റ ഗോളിൽ ഒന്നാമതായി ഹൈദരാബാദ്
ഐഎസ്എല്ലില്‍ ജയം തുടർന്ന് ഹൈദരാബാദ് എഫ്‌സി. എതിരില്ലാത്ത ഒരു ഗോളിന് എഫ്‌സി ഗോവയെ തോൽപ്പിച്ചു. ജാവിയർ സിവേരിയോയുടെ വകയായിരുന്നു ഹൈദരാബാദിന്റെ ഗോൾ. ഇതോടെ പോയിന്റ് പട്ടികയിൽ ഹൈദരാബാദ് മുന്നിലെത്തി. ലീഗിൽ ഇതുവരെ ഹൈദരാബാദ് തോൽവി അറിഞ്ഞിട്ടില്ല.
ഫ്‌ളഡ് ലൈറ്റിന്റെ തകരാർ മൂലം രണ്ടുവട്ടം മുടങ്ങിയ മത്സരത്തിൽ ആദ്യപകുതിയിൽ നേടിയ ഗോളാണ് ഇരു ടീമുകളെയും വേർതിരിച്ചത്. മത്സരത്തിന്റെ പതിനൊന്നാം മിനുട്ടിൽ നേടിയ ഗോളാണ് വിധിയെ നിർണയിച്ചത്. ബർത്തലോമിയോ ഒഗ്ബെചെയുടെ പാസിൽ നിന്നായിരുന്നു സ്പാനിഷ് യുവതാരത്തിന്റെ ഗോൾ. ഇതോടെ ഉണർന്ന് കളിച്ച ഗോവ ഗോൾ മടക്കാൻ ശ്രമിച്ചെങ്കിലും ലക്ഷ്യം കണ്ടില്ല.
രണ്ടാം പകുതിയിലും ഗോവയുടെ ആധിപത്യമാണ് ഗ്രൗണ്ടിൽ കണ്ടത്. പതുക്കെ മത്സരത്തിന്റെ താളം കണ്ടെത്തിയ ഹൈദരാബാദ് ലീഡ് വർധിപ്പിക്കാൻ ശ്രമിച്ചതോടെ മത്സരം ആവേശകരമായി. മികച്ച പാസിങ്ങിലൂടെ രണ്ട് ടീമുകളും കളം വാണപ്പോൾ എപ്പോൾ വേണമെങ്കിലും ഗോൾ എന്ന പ്രതീതി സൃഷ്ടിക്കപ്പെട്ടു. എന്നാല്‍ ലക്ഷ്യം ഭേദിക്കുന്നതിൽ ഇരു ടീമുകളും പരാജയപെട്ടു. ഒടുവിൽ മത്സരത്തിന്റെ 82ാം മിനുട്ടിൽ ലഭിച്ച പെനാൽറ്റി ഗോവ പാഴാക്കിയതോടെ തോൽവി സമ്മതിക്കുകയായിരുന്നു. അൽവാരോ വാസ്‌ക്വസ് എടുത്ത കിക്ക്‌ ഗോൾ പോസ്റ്റിന് പുറത്തേക്ക് പോയി.
ഗോവയുടെ സീസണിലെ ആദ്യ തോൽവിയാണിത്. മൂന്ന് മത്സരങ്ങളിൽ നിന്ന് രണ്ട് ജയവുമായി ആറ് പോയിന്റോടെ നാലാമതാണ് അവർ. വ്യാഴാഴ്ച ജംഷഡ്‌പൂരിനെതിരെയാണ് അവരുടെ അടുത്ത മത്സരം.
