ഐഎസ്എല്ലില്‍ സൂപ്പർ സാറ്റര്‍ഡേയിലെ ആദ്യ പോരാട്ടത്തിൽ സമനില. കരുത്തരായ മുംബൈ സിറ്റി എഫ്‌സിയെ ജെംഷഡ്പുര്‍ എഫ്‌സിയാണ് സമനിലയിൽ തളച്ചത്. ഇരു ടീമുകളും ഓരോ ഗോൾ വീതം നേടി. മുംബൈയ്ക്കായി ലാലിയൻസുവാല ചാങ്‌തെയും ജെംഷഡ്പുരിനായി ഡാനിയൽ ചിമയും സ്കോർ ചെയ്തു.
മുംബൈ സിറ്റി എഫ്‌സിയുടെ കിക്കോടെയാണ് മത്സരം തുടങ്ങിയത്. തുടക്കം മുതൽ ഇരു ടീമുകളും ആക്രമിച്ച് കളിച്ചതോടെ ഏത് നിമിഷവും ഗോൾ വീഴുമെന്ന പ്രതീതിയായിരുന്നു. എട്ടാം മിനുട്ടിൽ സുന്ദരമായ ടീം ഗോളിലൂടെ മുംബൈ ലീഡെടുത്തു. വലതുവിങ്ങില്‍ നിന്ന് മുൻ ജെംഷഡ്പുര്‍ താരം ഗ്രെഗ് സ്റ്റുവര്‍ട്ട് നൽകിയ പന്ത് ചാങ്‌തെ വലയിലാക്കുകയായിരുന്നു. എന്നാൽ മുംബൈയുടെ സന്തോഷത്തിന് അധികം ആയുസ്സുണ്ടായില്ല. നാലുമിനുട്ടിന് ശേഷം നൈജീരിയൻ താരം ഡാനിയൽ ചിമ ജെംഷഡ്പുരിനെ ഒപ്പമെത്തിച്ചു. ഇരു ടീമുകളും കളിയുടെ വേഗം കുറച്ചതോടെ ഇടവേളക്ക് പിരിയുമ്പോൾ സ്കോർ തുല്യതയിൽ തുടർന്നു.
രണ്ടാം പകുതിയിൽ ഗോൾ കണ്ടെത്തി വിജയം ഉറപ്പിക്കാൻ ഇരു ടീമുകളും ശ്രമിച്ചെങ്കിലും ഫലമുണ്ടായില്ല. മത്സരത്തിലുടനീളം ആധിപത്യം പുലർത്തിയത് മുംബൈ ആയിരുന്നു. പന്ത് കൈവശം വെക്കുന്നതിൽ എതിരാളികളേക്കാൾ ബഹുദൂരം മുന്നിലായിരുന്നു അവർ. എന്നാൽ ഗോളാക്കി മാറ്റുന്നതിൽ പരാജയപെട്ടു. മറു വശത്തു കിട്ടിയ അവസരങ്ങളെല്ലാം ഗോൾ മുഖം വിറപ്പിക്കാൻ ജെംഷഡ്പുരിനായി.
സമനിലയോടെ പോയിന്റ് പട്ടികയിൽ അക്കൗണ്ട് തുറക്കാൻ ജെംഷഡ്പുരിന് സാധിച്ചു. മൂന്ന് കളികളിൽ നിന്ന് ഒരു ജയവും രണ്ട് സമനിലയും നേടിയ മുംബൈക്ക് അഞ്ച് പോയിന്റുണ്ട്.
