ആ 'സെലിബ്രേഷന്' മാപ്പ്; വാന്‍ഗാലിനോടുള്ള പെരുമാറ്റത്തില്‍ ഖേദം പ്രകടിപ്പിച്ച് മെസി
ഖത്തര്‍ ലോകകപ്പ് ഫുട്‌ബോള്‍ ക്വാര്‍ട്ടര്‍ ഫൈനലിനിടെ നെതര്‍ലന്‍ഡ്സ് പരിശീലകന്‍ ലൂയിസ് വാന്‍ഗാലിനോടുള്ള മോശം പെരുമാറ്റത്തില്‍ ഖേദം പ്രകടിപ്പിച്ച് അര്‍ജന്റീന സൂപ്പര്‍ താരം ലയണല്‍ മെസി. അര്‍ജന്റീന- നെതര്‍ലന്‍ഡ്സ് മത്സരത്തിനിടെ 73ാം മിനിറ്റില്‍ രണ്ടാം ഗോള്‍ നേടിയ ശേഷം ഹോളണ്ട് പരിശീലകന്‍ ലൂയിസ് വാന്‍ഗാലിനു മുമ്പില്‍ ഓടിയെത്തി ചെവികൂര്‍പ്പിച്ച് നിലയുറപ്പിച്ചായിരുന്നു മെസിയുടെ ആഘോഷം. മെസിയുടെ ഈ ആഘോഷ പ്രകടനം ഏറെ വിമര്‍ശനങ്ങള്‍ക്കും ഇടയാക്കിയിരുന്നു.
മത്സരത്തിന് മുന്നോടിയായുള്ള വാര്‍ത്താ സമ്മേളനത്തില്‍ നെതര്‍ലന്‍ഡ്സ് മാനേജര്‍ അര്‍ജന്റീനയ്‌ക്കെതിരെ അപകീര്‍ത്തികരമായ പരാമര്‍ശങ്ങള്‍ നടത്തിയെന്ന് മെസ്സി ആരോപിച്ചിരുന്നു.മെസിയെയും അര്‍ജന്റീനയെയും തളയ്ക്കാനുള്ള വിദ്യ തന്റെ കൈയിലുണ്ടെന്നും മെസിയെ പൂട്ടുന്നത് എങ്ങനെയാണെന്ന് നിങ്ങള്‍ കണ്ടോളൂ എന്നുമായിരുന്നു മത്സരത്തിനു മുന്‍പ് ലൂയിസ് വാന്‍ഗാല്‍ പറഞ്ഞത്.
''വാന്‍ഗാല്‍ എന്താണ് പറഞ്ഞതെന്ന് എനിക്കറിയാമായിരുന്നു, എന്നാല്‍ അന്നത്തെ ആ സെലിബ്രേഷന് ഗോള്‍ നേടിയ ആവേശത്തില്‍ സംഭവിച്ചതാണ്. പിന്നീട് ഓര്‍ത്തപ്പോള്‍ ആ പ്രവര്‍ത്തി എനിക്ക് ഇഷ്ടപ്പെട്ടില്ല, ''ആന്‍ഡി കുസ്നെറ്റ്സോഫിന്റെ ''പെറോസ് ഡി ലാ കാലെ'യ്ക്ക് നല്‍കിയ അഭിമുഖത്തെ ഉദ്ധരിച്ച് ഇഎസ്പിഎന്‍ റിപ്പോര്‍ട്ട് ചെയ്തു. മത്സരശേഷം സഹപരിശീലകന്‍ എഡ്ഗാര്‍ ഡേവിഡ്‌സിനോടും മെസിയുടെ തട്ടിക്കയറിയിരുന്നു.
