ഹാർദിക്കും നടാഷയും വേർപിരിഞ്ഞു; ഔദ്യോഗിക പ്രഖ്യാപനം സമൂഹ മാധ്യമങ്ങളിലൂടെ

ഇന്ത്യൻ ക്രിക്കറ്റ് താരം ഹാർദിക്ക് പാണ്ഡ്യയും സെർബിയൻ മോഡലുമായ നടാഷ സ്റ്റാൻകോവിച്ചും വേർപിരിഞ്ഞു. സമൂഹമാധ്യമങ്ങളിലൂടെ പങ്കുവെച്ച സംയുക്ത പ്രസ്താവനയിലൂടെയാണ് ഇരുവരും ഇക്കാര്യം വ്യക്തമാക്കിയത്.

"നാല് വർഷത്തെ ഒരുമിച്ചുള്ള ജീവിതത്തിന് ശേഷം നടാഷയും ഞാനും വേർപിരിയാൻ തീരുമാനിച്ചിരിക്കുന്നു. ഒരുമിച്ച് മുന്നോട്ട് പോകാനുള്ള ശ്രമങ്ങള്‍ നടത്തി. ഈ തീരുമാനം ഞങ്ങള്‍ രണ്ട് പേരുടേയും താല്‍പ്പര്യത്തിന് അനുസരിച്ചാണ്," ഹാർദിക്ക് കുറിച്ചു.

ഒരുമിച്ച് ആസ്വദിച്ച നിമിഷങ്ങളും പരസ്പരം നല്‍കിയ ബഹുമാനവും സന്തോഷവും പരിഗണിക്കുമ്പോള്‍ ഈ തീരുമാനത്തിലെത്തുക എന്നത് കഠിനമായിരുന്നെന്നും ഹാർദിക്ക് പറയുന്നു. മകൻ അഗസ്ത്യയുടെ സന്തോഷത്തിന് ആവശ്യമായതെല്ലാം ഒരുമിച്ച് ചെയ്യുമെന്നും കുറിപ്പില്‍ കൂട്ടിച്ചേർത്തിട്ടുണ്ട്. പ്രയാസകരമായ നിമിഷത്തില്‍ സ്വകാര്യതയെ മാനിക്കണമെന്നും ഹാർദിക്ക് അഭ്യർഥിച്ചു.

2020ലായിരുന്നു ഹാർദിക്കും നടാഷയും വിവാഹിതരായത്. ഇന്ത്യയുടെ ട്വന്റി 20 ലോകകപ്പ് വിജയത്തില്‍ ഹാർദിക്ക് നിർണായക പങ്കുവഹിച്ചിരുന്നു. 11 വിക്കറ്റും 144 റണ്‍സുമായിരുന്നു താരം നേടിയത്. ഫൈനലില്‍ ഹെൻറിച്ച് ക്ലാസന്റേയും ഡേവിഡ് മില്ലറിന്റേയും നിർണായക വിക്കറ്റുകളും ഹാർദിക്കാണ് സ്വന്തമാക്കിയത്.

വരാനിരിക്കുന്ന ശ്രീലങ്കൻ പര്യടനത്തിലെ ട്വന്റി 20 ടീമില്‍ ഹാർദിക്ക് ഇടം നേടിയിട്ടുണ്ട്. ലോകകപ്പില്‍ വൈസ് ക്യാപ്റ്റനായിരുന്ന ഹാർദിക്കിനെ ഒരു സ്ഥാനത്തേക്കും പരിഗണിച്ചിട്ടില്ല. യുവതാരം ശുഭ്‌മാൻ ഗില്ലിനെയാണ് വൈസ് ക്യാപ്റ്റനായി തിരഞ്ഞെടുത്തിരിക്കുന്നത്.