റുപേ പ്രൈം വോളിബോള്‍ ലീഗ് ; ചെന്നൈ ബ്ലിറ്റ്സിനെ എതിരില്ലാതെ തകര്‍ത്ത് അഹമ്മദാബാദ് ഡിഫന്റേഴ്‌സ് ഒന്നാമത്
റുപേ പ്രൈം വോളിബോള്‍ ലീഗ് പവേര്‍ഡ് ബൈ എ23 രണ്ടാം സീസണില്‍ പോയിന്റ് പട്ടികയില്‍ അഹമ്മദാബാദ് ഡിഫന്‍ഡേഴ്സ് ഒന്നാമത്. ഞായറാഴ്ച ഹൈദരാബാദിലെ ഗച്ചിബൗളി ഇന്‍ഡോര്‍ സ്റ്റേഡിയത്തില്‍ നടന്ന മത്സരത്തില്‍ 5-0 ന് ചെന്നൈ ബ്ലിറ്റ്സിനെ തോല്‍പ്പിച്ചാണ് അഹമ്മദാബാദ് സീസണിലെ തുടര്‍ച്ചയായ മൂന്നാം ജയം നേടിയത്. സ്‌കോര്‍: 15-11, 15-13, 15-10, 15-9, 15-12. തകര്‍പ്പന്‍ പ്രകടനം നടത്തിയ നന്ദഗോപാല്‍ സുബ്രഹ്‌മണ്യം ആണ് കളിയിലെ മികച്ച താരം.
കളി മധ്യനിരയുടെ പോരാട്ടമായി മാറിയതോടെ അഖിന്റെ പ്രകടനം ബ്ലിറ്റ്സിന് നിര്‍ണായകമായി. ജോബിന്‍ വര്‍ഗീസിനെ ഇടതുവശത്തേക്ക് മാറ്റാനുള്ള ചെന്നൈയുടെ തന്ത്രം വിജയിച്ചെങ്കിലും, മനോജിന്റെയും നന്ദഗോപാലിന്റെയും സ്ഥിരതയാര്‍ന്ന ബ്ലോക്കുകളിലൂടെ അഹമ്മദാബാദ് കളിയില്‍ പിടിമുറുക്കി. എന്നാല്‍ അംഗമുത്തുവിന്റെയും സന്തോഷിന്റെയും സ്പൈക്ക് പിഴവുകള്‍ അഹമ്മദാബാദ് ഡിഫന്‍ഡേഴ്സിന്റെ പോയിന്റുകള്‍ ചോര്‍ത്തി.
മോയോയും റെനാറ്റോയും നിരന്തരം പന്തിന്റെ ദിശമാറ്റാന്‍ തുടങ്ങിയതോടെ ചെന്നൈ ബ്ലിറ്റ്സ് കളിയിലേക്ക് തിരിച്ചുവരുമെന്ന് തോന്നിച്ചു. എന്നാല്‍ ക്യാപ്റ്റന്‍ മുത്തുസാമി അപ്പാവു-അംഗമുത്തു സഖ്യം ചെന്നൈയുടെ നീക്കത്തിന് തടയിട്ടതോടെ കളിയുടെ നിയന്ത്രണം വീണ്ടും അഹമ്മദാബാദിന്റെ കൈകളിലായി.5-0 ന് ജയിച്ച് ഒന്നാം സ്ഥാനത്തേക്ക് കയറാനുള്ള അവസരം മുതലെടുത്ത് അഹമ്മദാബാദ് കുതിക്കുകയായിരുന്നു. നന്ദഗോപാലിന്റെ ശക്തമായ സര്‍വുകള്‍ക്ക് ചെന്നൈയുടെ കോര്‍ട്ടില്‍ നിന്ന് മറുപടിയുണ്ടായില്ല. മത്സരം തൂത്തുവാരിയ അഹമ്മദാബാദ് നിര്‍ണായകമായ മൂന്ന് പോയിന്റും സ്വന്തമാക്കി.
റുപേ പ്രൈം വോളിബോള്‍ ലീഗിലെ ഹൈദരാബാദ് ലെഗിന്റെ ആറാം ദിനമായ ഇന്ന് ഗച്ചിബൗളി ഇന്‍ഡോര്‍ സ്റ്റേഡിയത്തില്‍ രണ്ട് മത്സരങ്ങള്‍ നടക്കും. വൈകിട്ട് ഏഴിന് നടക്കുന്ന ആദ്യ മത്സരത്തില്‍ കൊല്‍ക്കത്ത തണ്ടര്‍ബോള്‍ട്ട്സ് മുംബൈ മിറ്റിയോര്‍സിനെ നേരിടും. രാത്രി 9.30ന് നടക്കുന്ന രണ്ടാം മത്സരത്തില്‍ തുടര്‍ച്ചയായ നാലാം വിജയം ലക്ഷ്യമിട്ട് അഹമ്മദാബാദ് ഡിഫന്‍ഡേഴ്സും കൊല്‍ക്കത്ത ഹീറോസും ഏറ്റുമുട്ടും.
